Nagpur Winter Session 2023 : 'क्या हुआ तेरा वादा!' धनगर आरक्षणाच्या आश्वासनाची फडणवीसांना करून दिली आठवण

Maharashtra Winter Session : नागपूर येथील हिवाळी अधिवेशनावर विविध मागण्यांसाठी अनेक मोर्चे धडकताना दिसत आहे. एसटी आरक्षणाची लवकर अंमलबजावणी करावी, यासाठी सोमवारी धनगर समाजाने नागपूर येथे मोठा मोर्चा काढला होता. यात उपमुख्यमंत्री देवेंद्र फडणीसांना उद्देशून झळकलेल्या फलकांनी लक्ष वेधून घेतले.

भाजप प्रदेशाध्यक्ष असताना फडणवीसांनी २०१३ मध्ये धनगर समाजाला सत्तेत आल्यास पहिल्या कॅबिनेटमध्येच आरक्षण देण्यात येईल, असे आश्वासन दिले होते. त्यानंतर राज्यासह देशात भाजपचे सरकार आले. फडणवीस मुख्यमंत्री झाल्याने आश्वासन पूर्ण करतील, अशी आशा समाजाला होती. मात्र पूर्ण पाच वर्षे सत्तेत असतानाही मागणी पूर्ण झाली नाही. आता पुन्हा राज्यात भाजपप्रणीत महायुतीची सत्ता आहे. त्यामुळे धनगर आरक्षणाच्या मागणीने जोर धरल्याचे दिसून येत आहे.

नागपूर अधिवेशनावर नेण्यात येणाऱ्या मोर्चात राज्यातील धनगर समाजाने मोठ्या संख्येने सहभागी होण्याचे आवाहन भाजप नेते आमदार गोपीचंद पडळकरांनी केले होते. त्यानुसार अधिवेशनावर मोठा मोर्चा काढण्यात आला. यावेळी आंदोलकांनी 'क्या हुआ तेरा वादा' या मजकुरासह उपमुख्यमंत्री फडणीसांच्या फोटोचे फलक झळकवले. धनगर समाजाला एसटी आरक्षण लवकर लागू करण्याची मागणी यावेळी करण्यात आली.

(राजकारणातील महत्त्वाच्या बातम्यांचे अपडेट्ससाठी सरकारनामाचे अधिकृत WhatsApp चॅनल फॉलो करा!)

फडणवीस आश्वासान विसरले ?

भाजप सरकार आल्यावर धनगरांना पहिल्या कॅबिनेटमध्ये आरक्षण देऊन असे आश्वासन उपमुख्यमंत्री देवेंद्र फडणवीस यांनी धनगर बांधवांना दिले होते. त्यामुळे आज हिवाळी अधिवेशनावर आरक्षणासाठी धनगर समाजाचा निघालेल्या मोर्चामध्ये सरकार 'क्या हुआ तेरा वादा' अशा आशयाचे पोस्टर घेऊन धनगर समाजाच्या महिला या मोर्चामध्ये सहभागी झाल्या. त्यामुळे देवेंद्र फडणवीस यांना पुन्हा धनगर बांधवांनी त्यांनी दिलेल्या आश्वासनाची आठवण करून दिली.

(Edited by Sunil Dhumal)