Shivsena News : शिंदेंनी शब्द पाळला... विदर्भातील नाराज शिलेदाराला 'मानाचे पान'; श्रद्धा आणि सबुरीचं फळ मिळालं!

Bhandara Political News: फडणवीस सरकारमध्ये मंत्रिपद न मिळाल्याने नाराज असलेल्या भंडाऱ्याचे शिवसेना आमदार नरेंद्र भोंडेकर यांचे अखेर पुनर्वसन झाले आहे. त्यांची विधानसभा विशेषाधिकार समिती (हक्कभंग) अध्यक्षपदी नियुक्ती करण्यात आली आहे. मंगळवारी विधानभवनात त्यांनी अध्यक्षपदाचा कार्यभारही स्वीकारला. पद स्वीकारल्यानंतर त्यांनी समितीतील अन्य सदस्यांची औपचारिक बैठक घेतली.

तत्कालीन मुख्यमंत्री एकनाथ शिंदे यांची विधानसभा निवडणुकीच्या प्रचारासाठी भंडाऱ्यातील पवनी इथे प्रचार सभा झाली होती. या सभेत मतदारांना आवाहन करताना त्यांनी भोंडेकर यांना भरघोस मतांनी निवडून द्या, त्यांना पालकमंत्री करू असा शब्द दिला होता. पार्सल पालकमंत्री ही परंपरा खंडित होऊन स्थानिक पालकमंत्री मिळेल या अपेक्षेने नागरिकांनी भोंडेकरांना तब्बल 35 हजारांपेक्षा अधिक मताधिक्यांनी निवडून दिले.

मात्र, फडणवीस सरकार स्थापन झाले तेव्हा नरेंद्र भोंडेकर यांना मंत्रिमंडळात स्थान मिळाले नाही. शिवाय भुसावळचे भाजप आमदार आणि वस्त्रोद्योग मंत्री संजय सावकरे यांच्याकडे पालकमंत्रीपदाची जबाबदारी देण्यात आली. पार्सल पालकमंत्रीपदाची परंपरा कायम राहिल्याने भोंडेकर चांगलेच नाराज झाले होते. त्यांनी शिवसेना उपनेतेपद आणि पूर्व विदर्भ संपर्क प्रमुख पदाचा राजीनामा देत पक्षश्रेष्ठींवरही नाराजी व्यक्त केली होती.

पण हिवाळी अधिवेशनादरम्यान एकनाथ शिंदे यांनी शिंदे यांनी भोंडेकर यांचा योग्य तो सन्मान होईल असा शब्द दिला होता. त्यामुळे आता आमच्या मनात जो राग होता तो विषय आता संपला आहे, असे म्हणत भोंडेकर यांनी युटर्न घेतला होता. आता अखेर नरेंद्र भोंडेकर यांचे पुनर्वसन झाले आहे. त्यांची विधानसभा विशेषाधिकार समिती (हक्कभंग) अध्यक्षपदी नियुक्ती करण्यात आली आहे. त्यांनी नुकताच अध्यक्षपदाचा कार्यभार स्वीकारून समितीत प्रलंबित असलेल्या विषयांवर चर्चा केली आणि आवश्यक सूचना दिल्या.