Vijay Wadettiwar Video : 'आमदार सुरेश धस यांचा दुटप्पीपणा', व्हिडिओ दाखवत विजय वडेट्टीवारांनी दिला पुरावा, म्हणाले, पोलिसांवर गुन्हे...

Vijay Wadettiwar Video : राज्याचे अन्न व नागरी पुरवठामंत्री धनंजय मुंडे यांना टार्गेट करणारे आणि त्यांचे घोटाळे उघडकीस आणणारे भाजपचे आमदार सुरेश धस यांच्यावर आता माजी विरोधीपक्षनेते विजय वडेट्टीवार यांनी निशाना साधला आहे. धस दुटप्पी आहे, असा आरोपही वडेट्टीवारांनी यांनी करत धश यांचा व्हिडिओच ट्विट केला आहे.

पोलिसांनी केलेल्या मारहाणीत सोमनाथ सूर्यवंशी याच मृत्यू झाला आहे. पोलिस कारवाईचे तो आपल्या मोबाईलने व्हिडिओ रेकॉर्डिंग करीत होता. म्हणून त्याला बेदम मारहाण करण्यात आल्याचा आरोप आहे. या विरोधात सूर्यवंशी कुटुंबीयांना न्याय मिळावा यासाठी काढण्यात आलेल्या मोर्चात आमदार सुरेश धस सहभागी झाले होते. मात्र दुसरीकडे त्यांनी पोलिसांवर गुन्हे दाखल करू नका, अशी मागणी सुरेश धस यांनी केली आहे.

सुरेश धस हे पोलिसांवर गुन्हे दाखल करून नका, असे म्हणत असल्याचा व्हिडिओ विजय विडेट्टीवार यांनी आपल्या ट्विटरवरून शेअर केला आहे. तसेच भाजपचे आमदार सुरेश धस यांचा दुटप्पीपणा. एकीकडे सोमनाथ सुर्यवंशी यांना न्याय मिळावा यासाठी काढण्यात आलेल्या मोर्च्यात सुरेश धस सहभागी होतात. आणि दुसरीकडे म्हणतात की पोलिसांवर गुन्हे दाखल करू नका..भाजप आमदार पोलिसांना क्लिनचीट का देत आहे? सोमनाथ सुर्यवंशी यांच्या जीवाची किंमत नाही का? असा सवाल केला आहे.

एका आईने आपला मुलगा आणि कुटुंबाने आधार गमावला आणि पोलिसांना फक्त तंबी देऊन सोडून द्यायचे हा कुठला न्याय, असे देखील वडेट्टीवार यांनी आपल्या ट्विटमध्ये म्हटले आहे. सुरेश धस यांना परभणी प्रकरणात सोमनाथ सूर्यवंशी यांच्या कुटुंबाला न्याय का मिळू द्यायचा नाही का? अशी विचारणाही विजय वडेट्टीवार यांनी केली आहे.

सरपंच देशमुख यांच्या हत्ये प्रकरणात मुंडे यांचे नाव न घेता आमदार धस 'आका' असा उल्लेख करून त्यांच्यावर निशाना साधत असतात. सरपंच देशमुख हत्या आणि सोमनाथ सूर्यवंशी यांच्या पोलिस कोठडीत मृत्य एकचवेळी झाली होती. मुंडे मंत्री असल्याने त्यांचे प्रकरण मीडियाने चांगलेच उचलून धरले होते. या धुरळ्यात सूर्यवंशीचा मृत्यूची फारशी चर्चा झाली नाही. मात्र, धस यांनी पोलिसांवर गुन्हे दाखल करू नका, असे म्हणत असल्याने त्यांच्या हेतुवर प्रश्नचिन्ह निर्माण केला जात आहे.