नागपूर : छत्रपती शिवाजी महाराजांनी आपल्याला ‘जान जाऐ पर वचन न जाऐ’ ही शिकवण दिली. वाटेल ते झाले तरी शब्द मोडायचा नाही. पण, दहा महिन्यांपूर्वी महाराष्ट्राला काळिमा लावण्याची कृती झाली. महाराष्ट्रातील मराठी माणूस खोक्याच्या माध्यमातून विकला गेला. हा शिवाजी महाराजांच्या महाराष्ट्राला लागलेला कलंक आहे. हा कलंक आपल्याला धुवून काढायचा आहे आणि पन्नास खोक्यांचा विषय आपल्याला कायमस्वरूपी संपवायचा आहे, अशा शब्दांत काँग्रेस (Congress) नेते सुनील केदार (Sunil kedar) यांनी मुख्यमंत्री एकनाथ शिंदे आणि त्यांच्या चाळीस सहकाऱ्यांवर हल्लाबोल केला. (Ten months ago there was an act to tarnish Maharashtra : Sunil Kedar)
महाविकास आघाडीची (Mahavikas Aghadi) वज्रमूठची दुसरी सभा आज (ता. १६ एप्रिल) नागपूर येथे होत आहे. त्या सभेत केदार बोलत होते. सभेला माजी मुख्यमंत्री उद्धव ठाकरे, विरोधी पक्षनेते अजित पवार, अंबदास दानवे, काँग्रेसचे प्रदेशाध्यक्ष नाना पटोले, राष्ट्रवादीचे प्रदेशाध्यक्ष जयंत पाटील, माजी गृहमंत्री अनिल देशमुख, विजय वडेट्टीवार, जितेंद्र आव्हाड उपस्थित होते.
सुनील केदार म्हणाले की, लोकशाहीच्या माध्यमातून देश चालावा, यासाठी डॉ. बाबासाहेब आंबडेकर यांनी संविधान लिहिले होते. मात्र, या देशाचे दुर्दैव असं की भाजपच्या लोकांनी दिल्लीत २०१७ मध्ये संविधान फाडलंच नाही, तर जाळूनसुद्धा टाकलं आहे, तरीसुद्धा आम्ही गप्प बसतोय. जे संविधान जाळतात, फाडून टाकतात, त्या लोकांना देशावर राज्य करण्याचा अधिकार आहे का, असा माझा सवाल आहे.
राजमाता जिजाऊ, छत्रपती शिवाजी महाराज यांनी या महाराष्ट्राला जगात आण बाण शान मिळवून दिलेली आहे. शिवाजी महाराजांनी आपल्याला ‘जान जाऐ पर वचन न जाऐ’ ही शिकवण दिली आहे. वाटेल ते झाले तरी शब्द मोडायचा नाही. पण, या महाराष्ट्राला काळिमा लावण्याची कृती दहा महिन्यांपूर्वी करण्यात आली. ही शरमेची गोष्ट आपल्या महाराष्ट्रात घडली आहे, असे केदार यांनी सांगितले.
ते म्हणाले की, दुर्दैव तरी पहा, आज महाराष्ट्रात कोणत्या घोषणेला सर्वांत जास्त प्रतिसाद मिळतो. ‘पन्नास खोके ऽऽ एकदम ओकेऽऽऽ हे दुर्दैव आहे महाराष्ट्राचं. या महाराष्ट्रातील मराठी माणूस खोक्याच्या माध्यमातून विकला जात आहे. हा छत्रपती शिवाजी महाराजांच्या महाराष्ट्राला लागलेला कलंक आहे. हा कलंक आपल्याला धुवून काढायचा आहे आणि पन्नास खोक्याचा विषय आपल्याला महाराष्ट्रातून कायमस्वरूपी संपवायचा आहे.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.
