Bhavana Gawali: शिंदे गटाच्या खासदार भावना गवळींना दणका; आयकर विभागाची मोठी कारवाई

Mumbai News: शिवसेना शिंदे गटाच्या खासदार भावना गवळी यांच्या संस्थेचे खाते आयकर विभागाने गोठवले आहे. तब्बल 8 कोटी 26 लाखांचा टॅक्स थकवल्याप्रकरणी आयकर विभागाकडून ही कारवाई करण्यात आल्याचे वृत्त समोर आले आहे. त्यामुळे खासदार भावना गवळी यांना मोठा धक्का बसला आहे.

या प्रकरणी'महिला उत्कर्ष प्रतिष्ठाण'चे बँक खाते गोठवण्यात आले असून विश्वस्त आणि संचालकांना देखील कारणे दाखवा नोटीस बजावण्यात आली आहे. आयकर विभागाने केलेल्या या कारवाईमुळे भावना गवळींच्या अडचणीत वाढ होण्याची शक्यता आहे. दरम्यान, आयकर विभागाने बजावलेल्या नोटीसीला समाधानकारक उत्तर न दिल्याप्रकरणी ही कारवाई करण्यात आल्याचे सांगितले जात आहे.

(राजकारणातील महत्त्वाच्या बातम्यांचे अपडेट्ससाठी सरकारनामाचे अधिकृत WhatsApp चॅनल फॉलो करा!)

आयकर विभागाकडून 29 डिसेंबरला भावना गवळींना नोटीस देण्यात आली होती. यानंतर पाच तारखेला त्यांना आपलं मत मांडायचं होतं. मात्र, त्या प्रत्यक्ष उपस्थित न राहता त्यांनी प्रतिनिधी पाठवत नोटीसला उत्तर दिलं. मात्र, आयकर विभागाला समाधानकारक उत्तर न मिळाल्याने 8 कोटी 26 लाखांचा टॅक्स भरण्यासाठी अखेर खासदार गवळींच्या महिला उत्कर्ष प्रतिष्ठान या संस्थेची खाती गोठवण्यात आली.

खासदार गवळी यांच्या संस्थेचे खाते गोठवण्यात आलेल्या वृत्तानंतर मात्र अद्याप त्यांची कोणतीही प्रतिक्रिया आलेली नाही. त्यामुळे या कारवाईवर खासदार गवळी काय प्रतिक्रिया देतात, हे पाहणे महत्वाचे असणार आहे. तर काही महिन्यांपूर्वी भावना गवळी यांच्या काही संस्थेवरही ईडीची धाड पडली होती. मनी लॉन्ड्रिंग प्रकरणी भावना गवळी यांना ईडीकडून समन्स देखील बजावण्यात आले होते.

दरम्यान, शिवसेनेत फूट पडल्यानंतर अनेक जणांनी उद्धव ठाकरेंची साथ सोडत एकनाथ शिंदेंच्या शिवसेनेत दाखल झाले होते. यामध्ये वाशिम यवतमाळच्या खासदार भावना गवळी या देखील सहभागी होत्या. भावना गवळी यांच्या संस्थेवर झालेली ही कारवाई त्यांच्यासाठी अडचणीची ठरण्याची शक्यता आहे.

(Edited By Ganesh Thombare)