अकोल्याच्या निवासी उपजिल्हाधिकाऱ्यांनी शिवजंतीला समर्पित केले हे गीत…

अकोला : अकोल्याचे (Akola) निवासी उपजिल्हाधिकारी संजय खडसे यांना गायनाची आवड आहे. ते आपला छंद नियमित जोपासत असतात. कोरोना जनजागृती गीतानंतर संजय खडसे यांनी शिवजयंती विशेष गीत गायले आहे. ते अकोल्यात निवासी उपजिल्हाधिकारी या पदावर कार्यरत असून त्यांना गीत गायनाची प्रचंड आवड आहे.

यापूर्वी संजय खडसे यांनी त्यांच्या पत्नी नीता खडसे यांच्यासह कोरोना लस जनजागृती गीत गायले होते. तर गायनाच्या कार्यक्रमात संजय खडसे नेहमीच सहभाग नोंदवत असतात. यावेळी त्यांनी ‘माझ्या राजाची (Chhatrapati Shivaji Maharaj) जयंती आली, शिवरायांची जयंती आली’ हे गीत सादर केले. छत्रपती शिवाजी महाराज यांच्या कार्यावर आधारित गीताने उत्साहात शिवजयंती साजरी व्हावी, याकरिता ‘महाराजांची जयंती आली, शिवरायाची जयंती आली’, हे गीत संगीतबद्ध करून शिवजयंतीच्या पर्वावर समर्पित केले आहे.

छत्रपती शिवाजी महाराजांची जयंती उत्साहात साजरी केली जाते. या गीताचे लेखन मुकुंद कुमार नितोने यांनी केले आणि निवासी उपजिल्हाधिकारी प्रा. संजय खडसे व त्यांच्या पत्नी नीता यांनी ते गायले. महाराष्ट्राचे दैवत छत्रपती शिवाजी महाराज यांच्या जीवन कार्यावर प्रकाश टाकणारे गीत लोकांना समर्पित करताना अतिशय आनंद होत आहे. प्रशासकीय कामांसोबत गायनाचा छंद आहे. त्याचा समाजात फायदा व्हावा व समाज प्रबोधन व्हावे, या करिता गीत तयार करण्यात आले असल्याचे प्रा. संजय खडसे यांनी सांगितले.

महाराष्ट्राचे दैवत छत्रपती शिवाजी महाराज यांच्या जयंतीनिमित्त आम्ही पाळणा छत्रपतींचं गीत तयार केलं. माझी आईसुद्धा पाळण्यामध्ये सहभागी झाली. त्यामुळे तिलाही मला आदर, सन्मान देता आला. महाराजांचे व्यक्तिमत्त्व अथांग सागर आहे, प्रभावी जाणते राजे होऊन गेले. त्यांच्यावर शब्दबद्ध केलेल्या गीताच्या काही ओळी सादर करता आल्या, हे माझं भाग्य आहे. प्रशासकीय कामे सांभाळून सुटीच्या दिवसांमध्ये आम्ही हे गीत तयार करण्यासाठी काम केले, असे प्रा. खडसे यांनी सांगितले.