Tumsar Election 2025: भाजप माजी आमदाराच्या पुतण्याची बंडखोरी; उमेदवारीवरुन मतभेद

भंडारा : Tumsar Election 2025 :भंडारा जिल्हातील तुमसर नगर परिषदेची निवडणूक वेगवेगळ्या राजकीय घटना घडामोडीने गाजत आहे. राष्ट्रवादी काँग्रेसचे राष्ट्रीय अध्यक्ष प्रफुल पटेल यांनी दिलेल्या अधिकृत उमेदवाराच्या विरोधात राष्ट्रवादीच्या उमेदवाराने बंडखोरी केली आहे. त्याला राष्ट्रवादीचे आमदार राजू कारेमोरे यांची साथ लाभली आहे.

आता भाजपातही कुरबुरी सुरू झाल्या आहेत. भाजपचे माजी आमदार मधुकर कुकडे यांनी पैसे मागितल्याशिवाय तिकीट दिले जात नाही, असा खळबळजनक आरोप केला आहे. त्यांच्या पुतण्याने भाजपच्या विरोधात येथे बंडखोरी केली आहे. येथे सर्वच पक्षांना बंडखोरीची लागण झाली असल्याने धक्कादायक निकाल लागण्याची शक्यता वर्तविली जात आहे.

तुमसर नगर परिषद भंडारा जिल्ह्यातील महत्त्वाची नगर परिषद मानली जाते. भाजपचे माजी आमदार मधुकर कुकडे यांचा पुतण्या आशिष कुकडे महत्त्वाचे दावेदार होते. त्यांना भाजपने शब्दही दिला होता. मात्र कुकडे यांना तिकट नाकारण्यात आले. त्यामुळे आशिष कुकडे यांनी बंडखोरी केली आहे. भाजपने माजी महापौर प्रदीप पडोळे यांना तिकीट दिले आहे. कुकडे यांच्या बंडखोरीमुळे फारकाही फरक पडणार नाही आम्ही आरामात निवडून येऊ असा दावा प्रदीप पडोळे यांनी केला आहे.

दुसरीकडे राष्ट्रवादी काँग्रेसने माजी महापौर अभिषेक कारेमोरे यांना तिकीट दिले आहे. यावरून राष्ट्रवादी काँग्रेसमध्ये मोठा असंतोष उफाळून आला आहे. तुमसरचे राष्ट्रवादीचे आमदार राजू कारेमोरे यांनी राष्ट्रवादीच्या बंडखोराला समर्थन जाहीर केले आहे. त्यांच्या रॅलीतही आमदार आणि त्यांच्या पत्नी उघडपणे सहभागी झाल्या होत्या. सागर गभणे हे त्यांचे उमेदवार आहेत. ते राष्ट्रवादी काँग्रेसचे तालुकाध्यक्ष आहेत.

उमेदवारी अर्ज दाखल केल्यानंतर प्रफुल पटेल यांनी सर्वांची समजूत काढण्याचा प्रयत्न केला. बंडखोरांनी माघार घ्यावी असे आवाहन केले होते. मात्र त्याला कोणीच प्रतिसाद दिला नाही. या उलट प्रफुल पटेल यांच्याच विरोधात राष्ट्रवादी काँग्रेसच्या कार्यकर्त्यांनी घोषणाबाजी केली होती. तुमसर विधानसभा मतदारसंघात भाजप आणि राष्ट्रवादी काँग्रेसमध्ये उमेदवारीवरून टोकाचे मतभेद निर्माण झाले असल्याचे यावरून दिसून येते.