Ujjwala Gas Scheme : उज्वला योजनेची महती सांगणा-यांना शेतकऱ्याने झाप झाप झापले !

लोकसभा निवडणुका तोंडावर आहेत. या निवडणुकीत 400 पारचा नारा भाजपनी दिलेला आहे. यासाठी मोदी सरकारने राबविलेल्या विविध योजना सामान्यापर्यत कशा पोहोचवल्या. अन् त्याचा किती फायदा त्यांच्या जिवनात झाला, याबाबत जनजागृती करण्याचे काम भाजपाकडून मोठया प्रमाणावर केले जात आहे.

याला अनेक ठिकाणाहून विरोध होत आहे. भारत विकसीत संकल्प यात्रेत 'भारत सरकार' हा उल्लेख अपेक्षित असतांना त्याठिकाणी 'मोदी सरकार'ला प्राधान्य देण्यात आल्याने विदर्भातील अनेक गावांत या यात्रांना गावात अडवून बाहेर पाठविण्यात आल्याच्या घटना घडल्या आहेत. आता लोकांना भ्रमणध्वनी करून उज्वला योजनेची महती सांगितली जात आहे.

अशाच एका प्रकारात उज्वला योजनेची महती सांगीत भाजपला पाठिंबा देणार का, असा प्रश्न विचारताच संतापलेल्या एका शेतक-याने शेतपिकाला मिळणारा हमीभाव व इतर मुदयावरून त्यांना असे काही सुनावले की, त्यांची जोरदार चर्चा सुरू झाली आहे. त्यांच्या संभाषणाची ऑडिओ क्लिप व्हायरल होत आहे. राष्ट्रवादीच्या शरद पवार गटाचे चंद्रपूर जिल्हयाध्यक्ष राजेंद्र वैदय यांनी ही क्लिप व्हायरल केल्याने जिल्हयात याबाबतची चांगलीच चर्चा रंगत आहे.

एका शेतकऱ्याला भाजप कार्यालयातून भ्रमणध्वनी आला. सिलिंडरचे भाव आता कमी होणार आहेत. तुम्ही भाजपाला पाठिंबा देणारं काय, असा प्रश्न केला गेला. बियाणे खरेदी करण्यासाठी पत्नीचे दागिने गहाण ठेवलेत, दागिने सोडवण्याइतपतसुद्धा पीक झालं नाही. अशी खंत व्यक्त करतानाच त्या शेतकऱ्याने म्हटलं, चार दाणे टाकून शेतकर्यांचे पालनपोषण करतोय, असा गवगवा करण्यापेक्षा, शेतकऱ्यांच्या मालाला भाव द्या. त्यात आम्ही समाधानी आहोत. पुढे हा शेतकरी म्हणतो, जग पोट भरतयं तोच जगाचा पोशिंदा कुटुंबाचे पोट भरू शकत नाही. त्यामुळे गळफास घेतोय, ही लाजिरवाणी बाब आहे. शेतकऱ्याचा हा ऑडिओ समाजमाध्यमात तुफान व्हायरल होत आहे.

(राजकारणातील महत्त्वाच्या बातम्यांचे अपडेट्ससाठी सरकारनामाचे अधिकृत WhatsApp चॅनल फॉलो करा!)

Edited By : Atul Mehere