Walmik Karade : वाल्मिक कराडने केले 25 खून, 14 वर्षांच्या मुलालाही संपवलं, माजी पोलिस अधिकाऱ्याकडून धक्कादायक दावा

Walmik Karade News : संतोष देशमुख हत्या प्रकरणात अटकेत असलेल्या वाल्मिक कराडचे एकामागून एक कारनामे समोर येत आहेत. महादेव मुंडे खून प्रकरणात वाल्मिक कराडचा हात असल्याचा आरोप करण्यात येत आहे. महादेव मुंडेंच्या पत्नीने नुकतीच मुख्यमंत्री देवेंद्र फडणवीस यांची भेट घेत एसआयटी स्थापन करण्याची मागणी केली होती. ती मागणी मान्य करण्यात आली आहे. मात्र, बीड पोलिस दलातील निलंबित पोलिस अधिकारी रणजित कासले यांनी वाल्मिक कराडविषयी धक्कादायक दावा केला आहे.

वाल्मिक कराड याने एक दोन नव्हे तर तब्बल 25 खून केले असल्याचा दावा कासले यांनी केला. त्यासंदर्भात कासेल याने एका व्हिडिओ करत गंभीर आरोप केले आहेत. कराडने परळीत खून करून काही बाॅयलरमध्ये टाकले असतील तर काही तुकडे तुकडे करून नदीत, तलावात टाकले असतील असे देखील कासले म्हणाला आहे. एका 14 वर्षांच्या मुलाला देखील मारले आहे. मात्र, 302 देखील दाखल नाही. फोटो आहेत माझ्याकडे असा दावा देखील त्यांनी केला आहे.

वाल्मिक कराड हा विकृत असून तो जेलमधून आपल्या फोन करून धमकी देखील देत असल्याचा आरोप कासले याने व्हिडिओतून केला आहे. दरम्यान, कासले हा बीडच्या जेलमध्ये असताना त्याने वाल्मिक कराडला व्हिआयपी ट्रिटमेंट मिळत असल्याचा आरोप केला होता. त्यासंदर्भात त्याने तक्रार देखील केली होती.

रणजित कासलेचे निलंबन का?

रणजित कासले हा बीडच्या पोलिस विभागात पीएसआयपदी होता.त्याची नियुक्ती सायबर विभागात होती. मात्र, तो एका प्रकरणात पोलिस आयुक्तांना कुठलीही माहिती न देता गुजरात गेला. तेथे त्याने एका व्यापाऱ्याकडे तब्बल एक कोटीच्या खंडणीची मागणी केली. तसेच बंदूक दाखवून दहशत निर्माण केली. कासले खंडणी मागत असल्याचा व्हिडिओ देखील समोर आला होता. त्यानंतर पोलिस आयुक्तांना त्याचे निलंबन केले होते.

पंकज कुमावत यांची एसआयटी

महादेव मुंडे खून प्रकरणात त्यांच्या पत्नीने एसआयटी स्थापन करण्याची मागणी मुख्यमंत्री देवेंद्र फडणवीस यांनी मान्य केली आहे. आयपीएस अधिकारी पंकज कुमावत यांच्या अध्यक्षतेखाली ही एसआयटी स्थापन करण्यात आली आहे. त्यामुळे महादेव मुंडे खून प्रकरणातील तपासाला गती मिळणार असून वाल्मिक कराड विरोधात फास आवळला जाणार असल्याची चर्चा आहे.