Yashomati Thakur interview: काँग्रेसला गळती का लागलीय? दोष पक्षाचा की नेत्यांचा? : यशोमती ठाकूर Exclusive

Pune News : विधानसभा निवडणुकीत महायुतीला जोरदार बहुमत मिळाले. त्यानंतरही भविष्यातील राजकारण डोळ्यासमोर ठेवून महायुतीत मोठ्या प्रमाणात इनकमिंग सुरु आहे. या इनकमिंगमध्ये काँग्रेसला मात्र मोठे धक्के बसत आहेत. माजी आमदार कुणाल पाटील, संग्राम थोपटे, संजय जगताप, सांगली काँग्रेसचे जिल्हाध्यक्ष राहिलेले पृथ्वीराज पाटील या नेत्यांनी काँग्रेस सोडली. अगदी माजी मुख्यमंत्री शंकरराव चव्हाण, माजी मुख्यमंत्री वसंतदादा पाटील यांची घराणीही भाजपच्या गळाला लागली. राज्यातील अनेक नेत्यांनी गेल्या काही दिवसात काँग्रेस सोडली आहे. त्याचे कारणच आता काँग्रेसच्या नेत्या व माजी मंत्री यशोमती ठाकूर यांनी सांगितले.

आपल्याला देखील ऑफर होती, असा गौप्यस्फोट यावेळी यशोमती ठाकूर (Yashomati Thakur) "सरकारनामाशी" बोलताना केला. ज्या नेत्यांनी चूक केली आहे ते नेते मंडळी ही केलेली चूक झाकून ठेवण्यासाठी भाजपमध्ये जात असल्याचे त्यांनी सांगितले. चुकीच्या गोष्टी केल्यानंतर होणारी कारवाई टाळण्यासाठी महायुतीचा पर्याय शोधला आहे, असा आरोप त्यांनी केला.

भाजपने (BJP) गेल्या काही दिवसात सत्तेच्या जोरावर अनेक पक्ष फोडले आहेत. त्यामुळे त्यांच्या विरोधात लढा देण्याची तयारी ठेवल्यास काहीच अडचण येत नाही. अथवा काँग्रेस सोडण्याची वेळ येणार नसल्याचे ठाकूर यांनी स्पष्ट केले.

माजी मुख्यमंत्री अशोक चव्हाण यांना पक्षाने सर्व काही दिले. त्यांचे वडील शंकरराव चव्हाण यांनी काँग्रेस पक्ष वाढीसाठी खूप प्रयत्न केले. त्यांचे योगदान काँग्रेस पक्ष विसरू शकणार नाही. मात्र, त्यानंतरही पक्षाने दोनवेळा मुख्यमंत्री पदाची संधी दिल्यानंतरही अशोक चव्हाण यांनी हिंदुत्त्ववादी भाजपसोबत जाण्याचा घेतलेला निर्णय पक्षासाठी वेदनादायी होता, असेही ठाकूर म्हणाल्या.

राजकारणात अनेक ऑफर येतात :

राजकारणात अनेक ऑफर येत असतात. मला कधी व कोणाच्या ऑफर आल्या होत्या, हे सांगण्याची गरज नाही. मात्र राजकारणात आपण एकनिष्ठ राहण्याची गरज आहे. माझे घराणे काँग्रेसशी एकनिष्ठ राहिले आहे. वडील आमदार होते तर आजी देखील राजकारणात होती. त्यामुळे ऑफर आली तरीही मी कधीच काँग्रेस सोडणार नाही. मी काँग्रेस पक्षवाढीसाठी भविष्यात देखील काम करीत राहणार आहे. मी पराभव विसरुन लगेचच पुढच्या निवडणुकीची तयारी करीत असल्याचे त्यांनी स्पष्ट केले.