Aaditya Thackeray : आदित्य ठाकरेंनी तिसऱ्यांदा घेतली फडणवीसांची भेट; कारण आलं समोर...

Mumbai : काही दिवसांपूर्वीच ‘सामना’ वृत्तपत्रातून मुख्यमंत्री देवेंद्र फडणवीस यांच्या कामाचे कौतुक करण्यात आले होते. निमित्त होते, गडचिरोलीतील विकासकामांचे. शिवसेना उद्धव ठाकरे पक्षाचे खासदार संजय राऊत यांनी मीडियाशी बोलतानाही त्याचा पुनरुच्चार केला होता. आता गुरूवारी पक्षाचे आमदार आदित्य ठाकरेंनी फडणवीसांची भेट घेतली. दोन्ही नेत्यांमधील मागील महिनाभरातील ही तिसरी भेट असल्याने चर्चांना उधाण आले आहे.

आदित्य ठाकरेंनी यांनी आज मुंबईत फडणवीस यांची भेट घेतली. फडणवीसांनी मुख्यमंत्रिपदाची शपथ घेतल्यानंतर ठाकरे त्यांना तीनदा भेटले आहेत. एकदा उद्धव ठाकरे यांच्यासोबत एकत्रितपणे फडणवीसांना शुभेच्छा देण्यासाठी त्यांच्या कार्यालयात भेट झाली होती. लोकांसाठी विरोधक आणि सत्ताधारी यांनी एकत्रितपणे काम करायला हवे, अशी भूमिका आदित्य ठाकरे सातत्याने मांडत आहेत.

आजच्या भेटीत काय झालं?

फडणवीसांची भेट घेतल्यानंतर आदित्य यांनी मीडियाशी संवाद साधला. मुंबईतील विविध भागांतील समस्यांसाठी ही भेट घेतल्याचे त्यांनी सांगितले. मोकळ्या मनाने इथे आलो आणि मुंबईतील समस्यांबाबत मुख्यमंत्र्यांची भेट घेतली. मुंबईतील निवृत्त पोलिसांना मुंबईतच घरे मिळावीत, सर्वांसाठी पाणी ही योजना मुंबईत लागू करावी, ही महत्वपूर्ण मागणी फडणवीसांकडे केल्याचे ठाकरेंनी केली.

मुंबईतील प्रत्येकाला पाणी मिळायला हवे. मागच्या मुख्यमंत्र्यांनी स्थगिती दिली होती. ती स्थगिती उठवण्याबाबत फडणवीस सकारात्मक असल्याचे त्यांनी सांगितले. टोरेस कंपनीतील घोटाळ्याबाबतही फडणवीस यांच्यासोबत चर्चा झाल्याचे ते म्हणाले. ठाकरेंनी काही दिवसांपूर्वीच होर्डिंग समस्येबाबत फडणवीसांना पत्र लिहिले होते.

आताच्या घडीला फडणवीस हे राज्याचे मुख्यमंत्री आहे. विरोधक म्हणून आम्ही काही प्रश्न त्यांच्याकडे मांडत असू, तर त्यात काहीच चुकीचे नाही. जनतेसाठी आम्ही एकत्रितपणे म्हणजे विरोधक आणि सत्ताधारी म्हणून काम करायला हवे, असे आदित्य ठाकरेंनी मीडियाशी बोलताना सांगितले.