Rohit Pawar : 'आता कुबड्यांची गरज संपली, मुंबई महापालिका निवडणुकीनंतर भाजप एकनाथ शिंदेंना टार्गेट करणार, ठाण्यातही नीट राजकारण करू दिलं जाणार नाही...'

Pune Land Scam : उपमुख्यमंत्री अजित पवार यांचा पुत्र पार्थ पवारांच्या कंपनीने जवळपास 1804 कोटी रुपयांची जमीन 300 कोटींमध्ये विकत घेतल्याच्या प्रकरणावरून राज्यातील राजकारण चांगलंच तापलं आहे. या प्रकरणावरून अजित पवारांना विरोधकांनी टार्गेट केल्याचं पाहायला मिळत आहे.

अशातच आता शरद पवारांच्या राष्ट्रवादीचे आमदार रोहित पवारांनी या जमीन गैरव्यवहार प्रकरणावर बोलताना, मुंबईची निवडणूक संपली की भाजप एकनाथ शिंदेंना टार्गेट करणार असल्याचा दावा केला आहे. त्यांच्या या वक्तव्यामुळे आता राजकीय चर्चांना उधाण आलं आहे.

रोहित पवार नेमकं काय म्हणाले?

पुण्यातील जमीन व्यवहार प्रकरणावर बोलताना रोहित पवार म्हणाले, चूक असेल तर भेदभाव न करता योग्य ती कारवाई झाली पाहिजे. आम्ही जेव्हा काही प्रकरणं पुढे आणतो तेव्हा मुख्यमंत्र्यांच्या जवळचा व्यक्ती असेल तर त्यांच्यावर कारवाई होत नाही.

मात्र, मुख्यमंत्र्यांना किंवा भाजपला नेत्यांना कुणाचा गेम करायचा असेल तर त्याच्यावर लगेच कारवाई होते. आम्ही सिडको प्रकरण पुढे आणले. त्या प्रकरणातील संबंधित व्यक्तीवर कारवाई होत नाही. पण पुणे जमीन घोटाळा प्रकरणात सुपरफास्ट कारवाई केली जाते, असं म्हणत त्यांनी भाजप नेत्यांवर कारवाई न करता मित्रपक्षांना टार्गेट केल्याची टीका केली.

तर भाजपला कुबड्याची गरज संपलेली असून अमित शहांनी इथे येऊन सांगितलं की, आम्हाला कुबड्यांची गरज नाही. त्यामुळे आता कुबड्यांची ताकद कमी करण्याचा प्रयत्न केला जात आहे. काहींची अपेक्षा होती, आदराने कुबड्यांना खोलीमध्ये टांगलं जाईल पण आता या कुबड्या तोडून चुलीत घालायचा भाजपचा प्रयत्न असल्याचा टोलाही पवार यांनी लगावला.

याचवेळी त्यांनी देवेंद्र फडणवीस राज्याचे मुख्यमंत्री झाल्यापासून राज्यात सगळ्यात जास्त जमीन घोटाळे झाले असून जर याला मुख्यमंत्री आणि दोन उपमुख्यमंत्री जबाबदार असल्याची टीका केली. दरम्यान, त्यांनी एकनाथ शिंदेंची भाजपला केवळ मुंबई महापालिका निवडणुकीसाठी गरज असून निवडणूक संपली की शिंदेंना टार्गेट केलं जाईल.

त्यांना राजकीयदृष्ट्या संपवण्याचा प्रयत्न केला जाईल, ठाण्यातही नीट राजकारण करू दिलं जाणार नाही, अशी भूमिका भाजपची शंभर टक्के असणार असल्याचा दावा रोहित पवार यांनी केला आहे. त्यांच्या या वक्तव्यावर आता भाजप आणि शिंदेंची शिवसेना काय प्रतिक्रिया देणार हे पाहणं महत्वाचं ठरणार आहे.