शिंदे-फडणवीस सरकारचा महाविकास आघाडीला आणखी एक धक्का...

पुणे : मुख्यमंत्री एकनाथ शिंदे (Eknath Shinde) यांच्या बंडानंतर शिवसेनेत फूट पडलीच मात्र, सत्तेवर असलेलं महाविकास आघाडी (Mahavikas Aghadi) सरकारही कोसळलं. यानंतर एकनाथ शिंदे यांनी भाजपच्या आणि आपल्यासोबत आलेल्या आमदारांच्या साथीने नवं सरकार स्थापन केलं. यानंतर मुख्यमंत्री म्हणून शपथ घेतलेले शिंदे यांनी महाविकास आघाडी सरकारने घेतलेल्या अनेक निर्णयांना स्थगिती देण्याचा सपाटाच लावाला आहे. (Eknath Shinde News, Uddhav Thackeray News)

दरम्यान आता शिंदे सरकारने पुन्हा एकदा महाविकास आघाडी सरकारला धक्का दिला असून राज्यातील सर्व जिल्हा नियोजन समित्या आणि कार्यकारी समितीवरील नामनिर्देशित सदस्य आणि विशेष निमंत्रित सदस्यांच्या नियुक्‍त्या रद्द केल्या आहेत. या निर्णयानुसार महाविकास आघाडी सरकारने नियुक्त केलेल्या पुणे जिल्ह्यातील डीपीसीवरील १८ सदस्यांचे पद रद्द झाले आहे. हा निर्णय म्हणजे विरोधी पक्षनेते अजित पवार यांना धक्का मानला जात आहे.

राज्यात सत्तांतर झाले असून आता शिंदे-फडणवीस सरकार आलं आहे. यामुळे डीपीडीसीवरील महाविकास आघाडी सरकारने केलेल्या सदस्यांच्या नियुक्‍त्या रद्द करण्यात आल्या आहेत. पुणे जिल्हा नियोजन समितीवर नामनिर्देशित सदस्यांची संख़्या चार, तर विशेष निमंत्रित सदस्यांची संख़्या १४ इतकी होती. राज्य शासनाकडून जिल्हा नियोजन समितीवर नामनिर्देशित सदस्य म्हणून नियुक्‍त्या करण्यात येत असतात. दरम्यान, शिंदे-फडणवीस सरकारने घेतलेल्या या निर्णयामुळे महाविकास आघाडीच्या आणखी एका निर्णयाला धक्का बसला आहे.