Shivsena Congress Alliance : एकनाथ शिंदेंना काँग्रेसची मदत, छुपी युती...; आमदार नरेंद्र मेहतांच्या आरोपाने खळबळ

प्रकाश लिमये

Narendra Mehta News : मीरा-भाईंदर महानगरपालिकेसाठी काँग्रेस व एकनाथ शिंदेंच्या शिवसेनेचीछुपी युती झाली असल्याचा आरोप भाजपचे आमदार नरेंद्र मेहता यांनी केला आहे. शिवसेनेचे काही उमेदवार सुरक्षित करण्यासाठी काँग्रेसने आपले अधिकृत उमेदवार मागे घेतले. एखाद्या राजकीय पक्षाने एबी फॉर्म दिलेले आपले अधिकृत उमेदवार मागे घेण्याची ही पहिलीच वेळ असल्याचेही मेहता यांनी सांगितले. काँग्रेसने मात्र हे आरोप फेटाळून लावले आहेत.

उमेदवारी अर्ज मागे घेण्याच्या दिवशी झीनत कुरेशी व दीपक बागरी या काँग्रेसच्या दोन अधिकृत उमेदवारांनी निवडणूकीतून माघार घेतली. त्याचप्रमाणे अन्य काही प्रभागातही काँगेसचे उमेदवारांनी आपले अर्ज मागे घेतले आहेत.

भाईंदर पश्चिम येथील प्रभाग ८ मध्ये काँग्रेसने चार जागांपैकी दोनच जागांवर उमेदवार दिले आणि शिवसेनेने देखील या प्रभागात दोनच उमेदवार दिले आहेत. यासाठी काँग्रेस सारख्या राष्ट्रीय पक्षाने आपला अधिकृत उमेदवार मागे घेतला, भाईंदर पूर्व भागातही काँग्रेसने आपली एकमेव उमेदवारी मागे घेतली तर शिवसेनेने देखील काँग्रेसचा प्रभाव असलेल्या मिरा रोडच्या प्रभागात उमेदवारच दिलेले नाहीत . यावरून दोघांमध्ये अघोषित युती झाली असल्याचे स्पष्ट झाले असल्याचा आरोप मेहता यांनी केला.

या छुप्या युतीला भाजप घाबरत नाही. मिरा भाईंदरमध्ये भाजपला जनाधार आहे आणि त्याच जोरावर भाजप ७० हुन अधिक जागा जिंकेल असा दावा देखील नरेंद्र मेहता यांनी केला.

काँग्रेसने मात्र हे आरोप फेटाळून लावले आहेत. मविआ मधील घटक पक्षांच्या बैठकीत काँग्रेसचा प्रभाव असलेल्या ४० ते ४५ जागा मागितल्या होत्या मात्र जागावाटपावर एकमत झाले नाही. त्यामुळे ज्या जागा कॉंग्रेसने मागितल्या होत्या त्याच जागा काँग्रेसने कायम ठेवल्या व उर्वरित जागेवरील उमेदवार मागे घेतले असा खुलासा काँग्रेसचे प्रदेश वरिष्ठ उपाध्यक्ष मुझफ्फर हुसेन यांनी केला.

शिदेंची शिवसेना भाजपसाठी डोकेदुखी

निवडणुकीत एकनाथ शिंदेंची शिवसेना भाजपसाठी डोकेदुखी ठरत आहे त्यामुळेच भाजप असे हास्यास्पद आरोप करत आहे, असा टोलाही मुझफ्फर हुसेन यांनी लगावला. या आरोप प्रत्यारोपांवरून भाजप व शिवसेनेतील स्थानिक पातळीवरील दरी आणखी रुंदावत आसल्याचे दिसून येत आहे.