BMC standing committee power balance : मुंबई महानगरपालिकेचा निकाल जाहीर झाल्यानंतर महापालिकेतील सत्तासमीकरण अधिकच रंजक बनलं आहे. विशेषतः स्थायी समितीच्या रचनेमुळे राजकीय वर्तुळात चर्चांना उधाण आलं आहे. कारण यंदा स्थायी समितीत सत्ताधारी आणि विरोधक यांचे संख्याबळ अगदी समसमान झालं असून, त्यामुळे महापालिकेचा कारभार नेमका कुणाच्या हातात राहणार, हा प्रश्न उपस्थित झाला आहे.
स्थायी समिती ही महापालिकेतील सर्वात महत्त्वाची समिती मानली जाते. अर्थसंकल्पाला मंजुरी देणं, कोट्यवधी रुपयांचे प्रस्ताव मंजूर करणं, धोरणात्मक निर्णय घेणं अशा अनेक अधिकारांचा केंद्रबिंदू ही समिती असते. त्यामुळे या समितीवरील सत्ता म्हणजेच प्रत्यक्षात महापालिकेचा ‘रिमोट’ कोणाकडे, हे ठरत असतं.
यंदाच्या निवडणुकीनंतर स्थायी समितीत सत्ताधारी गटाकडे भाजपचे 10 आणि शिवसेना शिंदे गटाचे 3 सदस्य आहेत. दोन्ही पक्षांची युती असल्यामुळे सत्ताधाऱ्यांचे एकूण संख्याबळ 13 इतकं आहे. मात्र विरोधी बाकांवरही तेवढेच 13 सदस्य आहेत. उद्धव ठाकरे गटाच्या शिवसेनेचे 8, काँग्रेसचे 3, मनसेचा 1 आणि एमआयएमचा 1 सदस्य मिळून विरोधकांची संख्या सत्ताधाऱ्यांइतकीच आहे. त्यामुळे कोणत्याही प्रस्तावावर बहुमत मिळवणं सत्ताधाऱ्यांसाठी आव्हानात्मक ठरणार आहे.
या समसमान स्थितीमुळे स्थायी समितीतील प्रत्येक निर्णयासाठी राजकीय समन्वय आणि रणनीती महत्त्वाची ठरणार आहे. एखाद्या प्रस्तावावर एकाही सदस्याची अनुपस्थिती किंवा मतभेद झाला, तर निर्णय अडू शकतो. त्यामुळे आगामी काळात स्थायी समितीच्या बैठका चांगल्याच गाजण्याची शक्यता आहे. या पार्श्वभूमीवर मुख्यमंत्री एकनाथ शिंदे यांची भूमिका आणि गेमप्लॅन काय असणार, याकडे सर्वांचे लक्ष लागलं आहे.
दरम्यान, इतर समित्यांचं चित्रही स्पष्ट झालं आहे. शिक्षण समितीच्या 22 सदस्यांमध्ये भाजपला 9, उद्धव ठाकरे गटाला 6, शिंदे गटाला 3, काँग्रेसला 2 तर मनसे आणि एमआयएमला प्रत्येकी 2 सदस्य मिळाले आहेत. याशिवाय चार बिगर-मनपा सदस्यांपैकी भाजपला 2, तर दोन्ही शिवसेनांना प्रत्येकी 1 सदस्य देण्यात आला आहे.
बेस्ट समितीत एकूण 16 सदस्य असणार असून, त्यात भाजपचे 6, उद्धव ठाकरे गटाचे 5, शिंदे गट आणि काँग्रेसचे प्रत्येकी 2, तर एमआयएमचा 1 सदस्य असेल. मनसेला मात्र या समितीत स्थान मिळालेलं नाही.
विशेष समितीमध्ये एकूण 36 सदस्य असतील. या समितीत भाजपचे 14, उद्धव ठाकरे गटाचे 10, शिंदे गटाचे 5, काँग्रेसचे 4, तर मनसे आणि एमआयएमला प्रत्येकी 1 सदस्य मिळणार आहे. राष्ट्रवादी काँग्रेसला या समितीत केवळ एकच सदस्य देण्यात येणार आहे. एकूणच, मुंबई महापालिकेतील पुढील कारभार राजकीय तोलामोलावर अवलंबून राहणार, हे आता स्पष्ट झालं आहे.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.