Parshuram Uparkar on Nitesh Rane : मंत्री राणेंचा इतिहासाचा अभ्यास कच्चा, ‘RSS’ची स्क्रिप्ट वाचतात; माजी आमदार उपरकर यांचा टोला

Maharashtra Politics News : भाजप मंत्री नीतेश राणे यांचा हिंदुत्वाचा 'अजेंडा', आक्रमक असा आहे. छत्रपती शिवाजी महाराज यांच्या दलात मुस्लिम नव्हते, इथपर्यंत तो पोचला आहे. त्यावरून राज्यात वाद निर्माण झाला असताना, त्यांच्या चौहू बाजूने टीका होत आहे.

शिवसेना उद्धव बाळासाहेब ठाकरे सेना पक्षाचे माजी आमदार परशुराम उपरकर यांनी मंत्री राणे यांच्यासह 'RSS'वर टीका केली आहे.

परशुराम उपरकर म्हणाले, "मंत्री नीतेश राणे (Nitesh Rane) यांचा इतिहासाचा अभ्यास कच्चा आहे. कारण ते इंग्रजी माध्यमातून शिकले आहेत. इतिहासाची तोडमोड करून ते दोन धर्मांमध्ये विनाकारण वाद निर्माण करण्याचा केविलवाणा प्रयत्न करत आहेत".

'राष्ट्रीय स्वयंसेवक संघ (RSS) स्क्रिप्ट पाठवतो आणि मंत्री नीतेश राणे तेच बोलतात. हेच नीतेश राणे काँग्रेसमध्ये असताना 'RSS'बद्दल किती खालच्या पातळीवर जाऊन बोलले आहेत, हे सर्वांना ठाऊक आहे', याची आठवण उपरकर यांनी करून दिली.

नीतेश राणे इंग्रजी माध्यमातून शिकल्याने त्यांना शिवाजी महाराजांचा इतिहास नव्हता. त्यामुळे त्यांना शिवाजी महाराजांच्या इतिहासाची पुस्तक कुरिअरने पाठवणार आहे, असा टोला माजी आमदार परशुराम उपरकर यांनी लगावला.

नीतेश राणेंचे काय होते विधान

मुस्लिम धर्मीयांबद्दल बेताल वक्तव्य करणाऱ्या नीतेश राणेंनी त्यांच्या वादग्रस्त विधानांची मालिका सुरूच ठेवली आहे. शिवरायांच्या सैन्यात एकही मुस्लिम नव्हता, असं म्हणत नीतेश राणे यांनी आपला एक वेगळा इतिहास मांडला आहे. त्यामुळे त्यांच्यावर आता वेगवेगळ्या स्तरांमधून टीका होत असून, पुस्तकांचा संदर्भ देत अनेकांनी त्यांचे हे वक्तव्य खोडून काढत आहे.