BJP cabinet expansion : भाजप 'शिवीगाळ अन् अर्वाच्च भाषा' नावाचे मंत्रालय स्थापन करणार; अतुल लोंढेंचा नेमका कोणाला टोला?

Mumbai News : महायुती सरकारच्या मंत्रिमंडळाचा विस्तार आणि शपथविधी सोहळा थोड्याच वेळात होईल. महायुतीमधील संभाव्य आमदारांना मंत्रि‍पदाच्या शपथेविधीचे निमंत्रण देण्यात आले आहे.

यात कोकणातील भाजप नेते आमदार नीतेश राणे यांना देखील शपथविधीचे निमंत्रण आहे. यावर काँग्रेसचे महाराष्ट्र प्रदेश कमिटीचे मुख्य प्रवक्ते अतुल लोंढे यांनी भाजपला खोचक टोला लगावला आहे. अतुल लोंढे यांनी याबाबत 'एक्स' खात्यावर पोस्ट शेअर केली आहे.

काँग्रेसचे (Congress) अतुल लोंढे यांनी त्यांच्या 'एक्स' खात्यावर शेअर पोस्टमध्ये, 'भाजपकडून कोकणातील एका आमदाराला मंत्रि‍पदासाठी फोन गेल्याचे ऐकिवात आहे. कदाचित कदाचित भाजप सरकारने शिवीगाळ व अर्वाच्च भाषा नावाचे मंत्रालय स्थापन करण्याचा निर्णय घेतला आहे', असा टोला अतुल लोंढे यांनी त्यांच्या पोस्टमधून लगावला आहे. या पोस्टचा रोख त्यांचा आमदार नीतेश राणे यांच्याकडे आहे. अतुल लोंढेंनी पोस्टमध्ये राणेंचे नाव न घेता भाजपला डिवचलं आहे.

भाजपचे (BJP) आमदार नीतेश राणे यांची विरोधकांवर टीका करताना, टोकाची भाषा वापरतात. हिंदुत्वाच्या मुद्यावर नेमकी आक्रमक असतात. सकल हिंदू समाजाचे राज्यात निघालेल्या मोर्चांमध्ये मुस्लिमांवर टीका करताना, त्यांची भाषा जहाल असते. यातून अनेकदा जातीय, धार्मिक तेढ वाढते. याशिवाय ठाकरे पिता-पुत्रांवर अगदी खालच्या एकेरी भाषेत टीका करतात. त्यामुळे ते नेहमी चर्चेत असतात. यातच त्यांना भाजपकडून महायुती सरकारमध्ये मंत्रि‍पदावर संधी देण्यात येत आहे. यावर काँग्रेसने निशाणा साधला आहे.

भाजपला मिळणार 20 मंत्रि‍पद

राज्य मंत्रिमंडळाच्या विस्तारात आज 39 मंत्री शपथ घेणार आहेत. आज मंत्रिपदाची शपथ घेणाऱ्या महायुतीच्या आमदारांची नावं समोर आली आहेत.  भाजपच्या वाट्याला मुख्यमंत्री देवेंद्र फडणवीस यांच्यासह 20 मंत्रि‍पदे आली आहेत. 

भाजपकडून कोणा कोणाला मंत्रि‍पदावर संधी

नीतेश राणे, शिवेंद्रराजे भोसले, चंद्रकांत पाटील, पंकज भोयर, मंगलप्रभात लोढा, गिरीश महाजन, जयकुमार रावल, पंकजा मुंडे, राधाकृष्ण विखे पाटील, गणेश नाईक, मेघना बोर्डीकर, अतुल सावे, जयकुमार गोरे, माधुरी मिसाळ, चंद्रशेखर बावनकुळे, संजय सावकारे, अशोक उईके, आकाश फुंडकर, आशिष शेलार यांना मंत्रिपदावर संधी मिळणार आहे.