Eknath Shinde Shiv Sena : एकनाथ शिंदेंचं ‘वन टू का फोर’; मुंबईसाठी माजी नगरसेवकांच्या 'कुमक'ची जुळवाजुळव

Eknath Shinde BMC confidence : मुंबई जिंकायचीच, असा चंग शिवसेना नेते उपमुख्यमंत्री एकनाथ शिंदे यांनी केलेला दिसतोय. यासाठी मुंबई महापालिकेसाठी महायुतीमधील भाजप आणि राष्ट्रवादी काँग्रेसला बाजूला सारत, मुंबईत कुमकची जुळवाजुळव केली आहे.

शिवसेनेत आतापर्यंत 124 माजी नगरसेवकांनी प्रवेश केला असल्याने, उपमुख्यमंत्री शिंदेंचा कॉन्फिडंट भलताच वाढला आहे. एकनाथ शिंदेंची या कुमकची जुळवाजुळव निश्चित झाली आहे. यामुळे ''वन टू का फोर' करत मुंबईत महायुतीची सत्ता येणारच', असा विश्वास एकनाथ शिंदे यांनी व्यक्त केला आहे.

स्थानिक स्वराज्य संस्थांच्या निवडणुकीसाठी एकनाथ शिंदे (Eknath Shinde) चांगलेच ॲक्टिव्ह मोडवर आले आहेत. आजी-माजी पदाधिकाऱ्यांचा शिवसेनेत पक्ष प्रवेशाचा धडका सुरूच ठेवला आहे. सायन कोळीवाड्यातील शिवसेना उद्धव बाळासाहेब ठाकरे सेना पक्षाचे माजी नगरसेवक रामदास कांबळे यांनी रविवारी ठाण्यात एकनाथ शिंदे यांच्या उपस्थितीत शिवसेनेत प्रवेश केला.

या प्रवेशामुळे एकनाथ शिंदे यांच्या शिवसेना पक्षात मुंबईत (Mumbai) आता 124माजी नगरसेवकांची कुमक तयार झाली आहे. एकनाथ शिंदे यांनी यावेळी केलेल्या भाषणातून उद्धव ठाकरेंचे नाव न घेता जोरदार टोलेबाजी केली.

एकनाथ शिंदे म्हणाले, ‘मुंबई महापालिकेत ज्यांची सत्ता 20 वर्षे होती, ते मुंबईला सोन्याची अंडी देणारी कोंबडी समजत होते; पण आपण मुख्यमंत्री असताना मुंबई खड्डेमुक्तीचा संकल्प केला, त्यातील एक टप्पा पूर्ण होईल, भविष्यात मुंबईत खड्डा शोधावा लागेल. त्यामुळे त्यांची दुकाने बंद झाली आहेत.’

आपण अडीच वर्षे मुख्यमंत्री असताना मुंबईत विकासकामे झाली, विकासासाठी शिवसेनेसोबत येण्याचा निर्णय रामदास कांबळे यांनी घेतला आहे. त्यांनी सुचवलेली बरीच कामे आपल्या अखत्यारित येतात, त्यामुळे विकासासाठी झटपट निर्णय घेतला जाईल, ही त्यांना खात्री आहे, या विश्वासावरच मुंबई महापालिका क्षेत्रातील 124 माजी नगरसेवक शिवसेनेसोबत आहेत. दरम्यान, महापालिका निवडणूक महायुती म्हणून लढणार असल्याचे एकनाथ शिंदे यांनी पुन्हा स्पष्ट केले.