Disha Salian Case : नितेश राणेंचा SIT वर आक्षेप; थेट आयुक्तांना लिहिले पत्र

Disha Salian Case Sit : दिशा सालियन मृत्यू प्रकरणात राज्य सरकारने एसआयटी नेमली आहे. पण या एसआयटीवर आता भाजप नेते आमदार नितेश राणे सवाल उपस्थित केला आहे. एसआयटीत एका दोषी अधिकाऱ्याचा समावेश केल्याने ती बेकायदेशीर ठरली आहे, असे नितेश राणे यांनी मुंबईचे विशेष पोलिस आयुक्त देवेन भारती यांना लिहिलेल्या पत्रात म्हटले आहे.

दिशा सालियन मृत्यू प्रकरणात मालवणी पोलिस ठाण्याच्या आरोपी अधिकाऱ्यांनी थातुरमातूर तपास करून संगनमताने बनावट क्लोझर रिपोर्ट बनवून तो तत्कालीन ACP यांच्या मार्फत हा अपघात असल्याचे दाखवून प्रकरण बंद केले होते. त्यानंतर या प्रकरणाची फाईल पुन्हा उघडून याप्रकरणी राज्य सरकारने एसआयटी स्थापन केली. त्या एसआयटीमध्ये चुकून मालवणी पोलीस स्टेशनचे वरिष्ठ निरीक्षक चिमाजी आढाव यांचाही समावेश करण्यात आला. पण उच्च न्यायालयाच्या आदेशानुसार मालवणी पोलीस ठाण्याचे आधीचे दोषी अधिकारी यांच्यावर आरोप आहेत. त्यामुळे त्या पोलीस ठाण्याचा कोणताही अधिकारी या प्रकरणाचा तपास करू शकत नाही. म्हणून चिमाजी आढाव हे एसआयटीचे सदस्य राहू शकत नाही. ते अपात्र असून एसआयटीमध्ये असल्याने ही एसआयटी बेकायदेशीर ठरली आहे. यामुळे चिमाजी आढाव यांना त्वरित एसआयटीमधून काढून टाकण्यात यावे, अशी मागणी नितेश राणे यांनी केली आहे.

(राजकारणातील महत्त्वाच्या बातम्यांचे अपडेट्ससाठी सरकारनामाचे अधिकृत WhatsApp चॅनल फॉलो करा!)

अभिनेता सुशांतसिंह राजपूत याची आधीची मॅनेजर दिशा सालियन हिचा 8 जून 2020 रोजी संशयास्पद मृत्यू झाला होता. या घटनेच्या सहा दिवसांनंतर 14 जून 2020 मध्ये अभिनेता सुशांतसिंह राजपूतचाही संशयास्पद मृत्यू झाला. सर्वोच्च न्यायालयाने सुशांतसिंह राजपूतच्या मृत्युसंबंधीचा तपास मुंबई पोलिसांकडून काढून घेत तो सीबीआयकडे दिला होता.