BMC Election : मुंबईत ठाकरे बंधूंचा ऐनवेळी प्लॅन बदलला : CM फडणवीस, शिंदेंच्या सभांना 'शाखा मोहीम'ने प्रत्युत्तर

मुंबई महापालिका निवडणुकीसाठी वचननामा जाहीर करीत रणशिंग फुंकल्यानंतर प्रतीक्षा होती ती ठाकरे बंधूंच्या संयुक्त सभांची. मात्र सभांपेक्षा शाखा शाखांना भेटी देऊन जनसंपर्कावर भर देण्याचे शिवसेना(उबाठा) पक्षप्रमुख उद्धव ठाकरे आणि मनसे अध्यक्ष राज ठाकरे यांच्यात ठरले. त्यामुळे मुंबईत तीनऐवजी आता एकच संयुक्त सभा दादरच्या शिवाजीपार्क मैदानावर होणार आहे.

महापालिका निवडणूकीच्या पार्श्वभूमीवर मुंबईत ठाकरे बंधूंच्या 3 सभा घेण्याचे नियोजन शिवसेना (उबाठा) आणि मनसे या दोन्ही पक्षांकडून करण्यात आले. त्यानुसार पहिली सभा पूर्व उपनगरात, दुसरी पश्चिम उपनगरात आणि पालिका सभांचा समारोप मुंबईतील दादर येथील शिवतीर्थ मैदानावर घेण्याचे ठरले होते.

मात्र, रविवारी वचननामा प्रकाशित करण्याच्या निमित्ताने उद्धव व राज ठाकरे सेनाभवनात आले होते. त्यावेळी दोघांमध्ये चर्चा होऊन त्यानंतर इतर सभांमध्ये शक्ती लावण्यापेक्षा शिवतीर्थावर एकच सभा घेण्यावर एकमत झाल्याचे संजय राऊत यांनी सांगितले. या आठवड्यात सभांऐवजी शाखांना भेटी देण्यावर ठाकरे बंधूंनी भर दिला असून शिवाजी पार्क मैदानावर ठाकरे बंधूंची सभा होणार असल्याची माहिती राऊत यांनी दिली.

11 : ठाणे, 12 : शिवाजीपार्क

उद्धव ठाकरे आणि राज ठाकरे यांची 9 जानेवारी रोजी नाशिक येथे संयुक्त जाहीर सभा होणार आहे. त्यानंतर 10 जानेवारी रोजी उद्धव ठाकरे छत्रपती संभाजीनगर येथे स्वतंत्र सभा घेणार आहेत. 11 जानेवारी रोजी ठाणे तर 12 जानेवारी रोजी शिवाजी पार्क येथे उद्धव व राज ठाकरे यांची संयुक्त सभा होणार आहे.