दरेकरांना मोठा दिलासा! उच्च न्यायालयाकडून अटकपूर्व जामीन मंजूर

मुंबई : भाजप (BJP) नेते आणि राज्याचे विधान परिषदचे विरोधी पक्षनेते प्रवीण दरेकर (Pravin Darekar) हे अडचणीत आले आहेत. दरेकरांच्या अटकपूर्व जामीन अर्ज सत्र न्यायालयाने फेटाळला होता. त्यामुळे त्यांनी अटकपूर्व जामीन अर्जासाठी उच्च न्यायालयात धाव घेतली होती. अखेर उच्च न्यायालयाने दरेकरांना दिलासा देत त्यांना जामीन मंजूर केला आहे. (Pravin Darekar News)

उच्च न्यायालयाने (Mumbai High Court) दरेकरांना अटकपूर्व जामीन अर्ज मंजूर केल्याने त्यांची अटक टळली आहे. दरम्यान, याआधी मजूर प्रकरणी दाखल गुन्ह्यात अटक न करण्याची दरेकर यांची मागणी उच्च न्यायालयाने फेटाळली होती. त्यानंतर दरेकरांनी सत्र न्यायालयात अर्ज दाखल केला होता. सत्र न्यायालयाने दरेकरांचा अटकपूर्जाव जामीन अर्ज फेटाळला होता. या निर्णयाला उच्च न्यायालयात आव्हान देण्यासाठी 29 मार्चपर्यंत अटकेपासूनचे संरक्षण कायम ठेवले होते. अखेर उच्च न्यायालयाने दरेकरांना दिलासा दिला आहे.

मुंबै बँकेच्या निवडणुकीत मजूर वर्गातून निवडणूक लढवणारे भाजप नेते प्रवीण दरेकर अडचणीत आले आहेत. या प्रकरणात मुंबई पोलिसांकडून दरेकर यांच्यावर गुन्हा दाखल करण्यात आला आहे. बँकेच्या निवडणुकीत प्रवीण दरेकर यांनी मजूर प्रवर्गातून अर्ज भरला होता. याला आक्षेप घेत तक्रार दाखल करण्यात आली होती. सहकार विभागाने याची चौकशी करुन दरेकरांना अपात्र ठरवले होते. मजूर म्हणून प्रवीण दरेकर हे सदस्यत्वाला अपात्र असल्याचे सहकार विभागाने म्हटले होते.

कामगार असल्याचा दावा करून दरेकर हे 1999 मध्ये कामगार सहकारी संस्थेचे सदस्य झाले. त्यांनी 2016 मध्ये विधान परिषद निवडणुकीपूर्वी दाखल केलेल्या प्रतिज्ञापत्रात त्यांच्याकडे 2.3 कोटी रुपयांची मालमत्ता होती. त्यांच्याकडे 2.5 लाख रुपयांच्या मासिक उत्पन्नासह 91 लाख रुपयांची रोकड होती. यावरून ते मजूर नसल्याचे दिसून येते, असेही सरकारी वकिलांनी न्यायालयाच्या निदर्शनास आणून दिले. विधान परिषदेच्या निवडणुकीवेळी दिलेल्या प्रतिज्ञापत्रात दरेकरांनी उत्पन्नाचे साधन म्हणून स्वतंत्र व्यवसाय असे नमूद केले होते.