"मी मोठा की तू मोठा गद्दार, जणू स्पर्धाच लागली.."

मुंबई : अंधेरीपूर्व मतदारसंघाच्या पोटनिवडणुकीवरून राजकीय वातावरण पेटले आहे. सत्तापालट झाल्यानंतरची ही निवडणूक सर्वच पक्षांसाठी प्रतिष्ठेची बनलेली आहे. भाजपकडून मुरजी पटेल (Murji Patel) तर ठाकरे गटाकडून ऋतुजा लटके यांना उमेदवारी देण्यात आली आहे. उमेदवार जाहीर झाल्यानंतर वेगवेगळ्या घडामोडी घडताना दिसून येत आहेत. शिवसेना ठाकरे गटाच्या नेत्या किशोरी पेडणेकर यांनी शिंदे गटाचे नेते किरण पावसकर यांच्यावर जहरी टीका केली आहे.

पेडणेकर यांनी आक्रमक होत, पावसकरांचा खरपूस समाचार घेतला. पेडणेकर म्हणाल्या की, हरीश वरळीकर या व्यक्तिने किरण पावसकरांच्या यांच्या थोबाडीत वाजवली होती. पावसकरांनी सहा वर्षे राष्ट्रवादी काँग्रेसची आमदारकी भोगली. आता यांच्यातच स्पर्धा लागली आहे की, मी मोठा गद्दार की तू मोठा गद्दार हे सांगण्याची. मात्र यात किरण पावसकरचा पहिला नंबर लागला, अशा शब्दात पेडणेकरांनी पावसकरांवर घणाघात केला.

दरम्यान, न्यायालयीन लढाई लढल्यानंतर अखेर महापालिकेने त्यांचा राजीनामा मंजूर केला. राजीनामा मंजूरीचे पत्र हाती येताच ऋतुजा लटके शिवसेनेच्या बाजूने अंधेरीपूर्व मतदारसंघाच्या निवडणुकीत आपला उमेदवारी अर्ज दाखल केला. तर भाजपच्या बाजून मुरजी पटेलांनी उमेदवारी अर्ज भरला. आता शिवसेनेकडून ऋतुजा लटके आणि भाजपचे मुरजी पटेल असा दुरंगी सामना पाहायला मिळणार आहे.