BJP Politics : बंडखोर स्वगृही! अपक्ष नगरसेवक अनिल भोसलेंचा भाजपला पाठिंबा

प्रकाश लिमये

Mira-Bhayandar News : मीरा-भाईंदर महापालिकेत निवडून आलेला एकमेव अपक्ष व भाजपचा बंडखोर स्वगृही परतला आहे. कोकण विभागीय आयुक्तांकडे नोंदणी करताना अपक्ष नगरसेवक अनिल भोसले यांनी भाजपला पाठिंबा दिला आहे. भाजपच्या गटनेतेपदी हसमुख गेहलोत यांची निवड झाली आहे.

निवडणुकीदरम्यान भाजपने 22 माजी नगरसेवकांना उमेदवारी नाकारली होती. त्यात काशी मिरा येथील प्रभाग १४ चे माजी नगरसेवक अनिल भोसले यांचाही समावेश होता. वास्तविक २०१७ च्या निवडणुकीतही भोसले यांना भाजपकडून उमेदवारी मिळाली नव्हती. मात्र त्यावेळी त्यांची स्वीकृत नगरसेवक पदी नियुक्ती करण्यात आली होती.

यावेळी त्यांनी पुन्हा एकदा प्रभाग १४ मधून उमेदवारी मागितली. मात्र ती नाकारण्यात आली. त्यामुळे भोसले यांनी बंडखोरी करत निवडणूक लढवली व भाजपाच्या अधिकृत उमेदवार मीरा देवी यादव यांचा पराभव करून ते निवडून आले. प्रचारादरम्यान पक्षाच्या नावाचा वापर केल्यामुळे त्यांच्यावर शिस्त भंगाची कारवाई करत भाजपमधून त्यांना निलंबितही करण्यात आले होते.

अनिल भोसले यांनी मात्र निवडून आल्यानंतर आपण भाजपसोबत जाणार असल्याचे जाहीर केले. त्यानुसार शुक्रवारी त्यांनी भाजपच्या नगरसेवकांसोबत कोकण विभागीय आयुक्तांकडे नोंदणी करत भाजपला बिनशर्त पाठिंबा दिला.

आपण मूळचे भाजपचेच आहोत, लोकांची कामे करायची असल्याने आपण पक्षासोबत जायचा निर्णय घेतल्याचे अनिल भोसले यांनी सांगितले. भोसले यांच्या पाठींब्यामुळे भाजपचे संख्याबळ ७९ झाले आहे. महापालिकेतील भाजपच्या गटनेतेपदी माजी उपमहापौर हसमुख गेहलोत यांची निवड करण्यात आली आहे.