Devendra Fadnavis : सत्तेत असतानाही दुजाभाव; पदाधिकाऱ्याचा रोख शिंदे गटाकडे, थेट फडणवीसांकडे तक्रार

Mumbai : उपमुख्यमंत्री देवेंद्र फडणवीस हे कल्याणचे भाजप आमदार गणपत गायकवाड यांच्या घरी वैयक्तिक भेटीसाठी आले होते. या वेळी पदाधिकाऱ्यांनी त्यांच्यासमोर पोलिस आणि शिंदे गटाबाबतची खंत व्यक्त केली. "साहेब, आपण सत्तेत असतानाही पोलिस आमच्यासोबत दुजाभाव करतात, प्रशासन आम्हाला डावलतंय," अशी व्यथा भाजप जिल्हा अध्यक्ष नरेंद्र सूर्यवंशी यांनी फडणवीसांकडे मांडली.

वाद अनेकदा चव्हाट्यावर

विकासकामांबाबत देखील प्रशासन भाजपच्या माजी नगरसेवक लोकप्रतिनिधींना डावलत असल्याचेदेखील पदाधिकाऱ्यांनी उपमुख्यमंत्री फडणवीसांच्या निदर्शनास आणून दिले. या भेटीदरम्यान भाजप पदाधिकाऱ्यांचा रोख सत्ताधारी शिवसेना शिंदे गटाकडे होता. कल्याण लोकसभा मतदारसंघात शिवसेना शिंदे गट व भाजपमधील वाद अनेकदा चव्हाट्यावर आले आहेत.

अंतर्गत धुसफूस कायमच

याबाबत भाजप व शिंदे गटाच्या वरिष्ठ नेत्यांनी मध्यस्थी करीत हा वाद मिटला असल्याचे स्पष्टीकरण दिले होते. मात्र, आज पुन्हा एकदा भाजप पदाधिकाऱ्यांनी सत्तेत असूनदेखील भाजपसोबत दुजाभाव सुरू आहेत. डावलले जात असल्याची व्यथा फडणवीसांसमोर मांडली. त्यामुळे शिवसेना शिंदे गट व भाजपमधील अंतर्गत धुसफूस कायमच असल्याचे चित्र आहे.

कोणतीही कारवाई झाली नाही...

"आमच्या कार्यकर्त्याला शिवसेना शिंदे गटाच्या माजी नगरसेवकाकडून मारहाण झाली. मात्र, त्याच्यावर कोणतीही कारवाई झाली नाही. पोलिसांकडून दुजाभाव सुरू आहे. आमचे लोकप्रतिनिधी, माजी नगरसेवकांना विकासकामांसंदर्भात प्रशासनाकडून डावलले जात आहे," अशी व्यथा भाजप जिल्हाध्यक्ष नरेंद्र सूर्यवंशी यांनी मांडली .

वरिष्ठ नेत्यांकडून वादावर पडदा...

उपमुख्यमंत्री देवेंद्र फडणवीस कल्याणचे भाजप आमदार गणपत गायकवाड यांच्या घरी वैयक्तिक भेटीसाठी आले होते. यादरम्यान भाजप नेत्यांनी आपली खदखद बोलून दाखवली आहे .भाजप पदाधिकाऱ्यांनी प्रसिद्धी माध्यमांशी बोलताना कुणाचं नाव घेतलं नसलं तरी त्यांचा रोख अप्रत्यक्षरित्या शिवसेना शिंदे गटाकडे होता . त्यामुळे भाजप व शिवसेना शिंदे गटाच्या वरिष्ठ नेत्यांकडून वादावर पडदा पडल्याचे बोलले जात असले तरी कल्याणमध्ये भाजप आणि शिंदे गटात धुसफूस सुरू असल्याचे स्पष्ट झाले आहे .