भाजप विधान परिषदेतही शिवसेनेला दाखवणार आसमान?

मुंबई : मुख्यमंत्री एकनाथ शिंदे (Eknath Shinde) यांच्यासह शिवसेनेतील 39 बंडखोर आमदार भाजपसोबत (BJP) गेल्याने महाविकास आघाडीचं सरकार कोसळलं आहे. तर विधानसभा अध्यक्षपदाच्या निवडणुकीतही त्यांनी 164 संख्याबळ जमवून दाखवत बहुमत सिध्द केलं. त्यानंतर आता विधान परिषदेतही भाजपकडून शिवसेनेला आसमान दाखवले जाऊ शकते, अशी चर्चा राजकीय वर्तुळात रंगली आहे. (Mahavikas Aghadi Latest News)

सध्या विधान परिषदेचे सभापती रामराजे नाईक निंबाळकर (Ramraje Naik Nimbalkar) तर उपसभापती नीलम गोऱ्हे (Neelam Gorhe) आहेत. रामराजे यांचं सदस्यत्वाचा कालावधी सात जुलै रोजी संपत आहे. नुकत्याच झालेल्या निवडणुकीत ते विजयी झाले आहेत. पण सभापतीपदाची निवडणूक होण्याची शक्यता आहे. तर नीलम गोऱ्हे यांच्यावर सरकारकडून अविश्वासदर्शक ठराव आणला जाऊ शकतो. विधान परिषदेतील विरोधी पक्षनेते प्रविण दरेकर आणि गोऱ्हे यांच्यात सभागृहातच अनेकदा वाद झाले आहेत.

पण विधान परिषदेतील संख्याबळ पाहता भाजपकडे सध्या पुरेसं संख्याबळ नाही. भाजपचे सध्या वरिष्ठ सभागृहात 24 सदस्य आहेत. तर शिवसेनेचे 11, राष्ट्रवादी व काँग्रेसचे प्रत्येकी 10 सदस्य आहेत. तर एकूण 16 जागा रिक्त असून त्यापैकी 12 जागा या राज्यपाल नियुक्त आहेत. महाविकास आघाडी सरकारकडून 12 जणांची यादी राज्यपालांकडे दिली होती. पण दोन वर्ष उलटूनही या यादीवर मोहोर उमटलेली नाही.

आता भाजप आणि शिंदे गट एकत्र आल्याने त्यांच्याकडून नवी यादी राज्यपालांकडे पाठवली जाऊ शकते. राज्यपालांनी ही यादी अंतिम केल्यास भाजप व शिंदे गट विधान परिषदेतही बहुमताच्या जवळ येईल. त्यानंतर त्यांच्यासाठी अनेक गोष्टी सोप्या होणार आहेत. त्याचा मोठा फटका महाविकास आघाडीला बसेल.

विधान परिषदेतील पक्षनिहाय संख्याबळ -

भाजप - 24

शिवसेना - 11

राष्ट्रवादी काँग्रेस - 10

काँग्रेस - 10

राष्ट्रीय समाज पक्ष - 1

लोकभारती - 1

पीझंट्स अॅण्ड वर्कर्स पार्टी ऑफ इंडिया - 1

अपक्ष - 4

रिक्त - 16

एकूण - 78