Mahapalika Election : ठाकरेंनी आवाज उठवताच आयोगाने मोठी चूक सुधारली; मुंबईत काय घेतला निर्णय?

Mumbai Election : राज्यातील २९ महापालिकांच्या निवडणुकीची मतदान प्रक्रिया आता पूर्ण झाली आहे. आता कोणत्या महापालिकेत कुणाची सत्ता येणार, याचे आडाखे बांधले जाऊ लागले आहेत. तत्पूर्वी, मतदान सुरू असताना बहुतेक ठिकाणी शाई पुसणे, बोगस मतदान, पैसे वाटप, मतदारयादीतील गोंधळाच्या तक्रार करण्यात आल्या. मुंबईत टपाली मतपत्रिकांवरूनही वाद निर्माण झाला होता.

शिवसेना उद्धव बाळासाहेब ठाकरे पक्षाचे प्रमुख उद्धव ठाकरे यांनी पत्रकार परिषद घेत टपाली मतपत्रिकांबाबत निवडणूक अधिकाऱ्यांनी घेतलेल्या निर्णयाकडे लक्ष वेधले होते. मतदान सुरू असताना टपाली मतपत्रिकांच्या पेट्या स्टाँग रूममधून बाहेर काढण्यात येतील, असे पत्र मुंबईतील प्रभाग क्रमांक २०० ते २०६ च्या निवडणूक निर्णय अधिकाऱ्यांनी उमेदवारांना पाठविले होते. ठाकरेंनी त्यावर आक्षेप घेतला होता.

निवडणूक आयोगाने आता हे पत्र अनावधानाने पाठविण्यात आल्याचा खुलासा केला आहे. निवडणूक निर्णय अधिकारी - २१ (प्रभाग क्रमांक २०० ते २०६) यांनी टपाली मतपत्रिकांबाबत दिनांक ८ जानेवारी २०२६ रोजी सर्व उमेदवारांना पाठविलेले पत्र अनावधानाने प्रसारित झाले होते. पत्र तत्काळ मागे घेण्यात आले असून त्याऐवजी सुधारित पत्र निर्गमित करण्यात आले आहे.

गुरुवार, १५ जानेवारी २०२६ रोजी दुपारी ३.०० वाजता टपाली मतपत्रिकांच्या पेट्या अभिरक्षा कक्षातून (स्टाँग रुम) बाहेर काढण्यात येणार नाहीत. राज्‍य निवडणूक आयोग, महाराष्‍ट्र यांच्‍या आदेशानुसार, टपाली मतपत्रिकेच्‍या पेट्या मतदान यंत्रासह (ईव्हीएम) मतमोजणीच्या दिवशी म्हणजेच शुक्रवार, दिनांक १६ जानेवारी २०२६ रोजी अभिरक्षा कक्षातून बाहेर काढण्‍यात येतील, असे आयोगाने स्पष्ट केले आहे.  

उमेदवार किंवा उमेदवाराने अधिकृतरीत्या नेमलेले प्रतिनिधी यांनी नमूद केलेल्या वेळेत उपस्थित राहावे, असे सर्व निवडणूक निर्णय अधिकारी यांनी कळविले आहे. टपाली मतपत्रिकांचे प्रभागनिहाय विलगीकरण देखील त्याचवेळेला करण्यात येणार आहे, असे मुंबई महानगरपालिकेच्या जनसंपर्क कार्यालयामार्फत कळविण्यात आले आहे.