Nawab Malik : भाजपच्या विरोधानंतर नवाब मलिकांनी थेटच सांगितलं; म्हणाले, अजित पवारांशिवाय...

Mumbai : माजी मंत्री नवाब मलिक यांच्या उमेदवारीवरून महायुतीत मिठाचा खडा पडला आहे. मलिकांनी राष्ट्रवादी काँग्रेसचा एबी फॉर्म जोडत उमेदवारी अर्ज भरल्यानंतर भाजपने त्याला विरोध दर्शवला आहे. या विरोधानंतर मलिकांनीही हे अपेक्षितच होते असे म्हणत काळजीचे कारण नसल्याचे सांगितले आहे.

मानखुर्द शिवाजीनगर मतदारसंघातून मलिकांनी अर्ज दाखल केला आहे. याच मतदारसंघातून एकनाथ शिंदेंच्या शिवसेनेचाही उमेदवार आहे. तोच महायुतीचा अधिकृत उमेदवार असून त्यांचाच प्रचार करणार असल्याचे भाजप नेत्यांनी स्पष्ट केले आहे.

भाजपच्या या भूमिकेवर बोलताना नवाब मलिक म्हणाले, मानखूर्द-शिवाजीनगर या मतदारसंघात शिवसेनेचे सुरेश पाटील उमेदवार आहेत. भाजप त्यांना मदत करत आहे. माझ्या मुलीच्या मतदारसंघातही तीच स्थिती आहे. भाजप आणि एकनाथ शिंदे यांची शिवसेना मला विरोध करत असले तरी माझ्यासाठी काळजीचे कारण नाही. ते अपेक्षितच होते.

दोन्ही मतदारसंघात मोठ्या मताधिक्याने आम्ही निवडून येऊ. लोकांनीच मला निवडणूक लढण्याचा आग्रह केला. भाजप, शिवसेनेचा विरोध असला तरी मला लोकांचा पाठिंबा आहे. अजित पवारांनी भाजपसोबत राजकीय युती केली आहे. आम्ही धर्मनिरपेक्ष आणि लोकशाही व्यवस्थेला मानणारे आहोत. राज्यात अजित पवारांशिवाय कोणतेही सरकार येऊ शकत नाही, हे स्पष्ट आहे. ते विचारधारेशी तडजोड करत नाहीत, असे मलिकांनी स्पष्ट केले.

मलिकांचे दहशतवाद्यांशी संबंध असल्याचा गंभीर आरोप महाविकास आघाडीची सत्ता असताना देवेंद्र फडणवीस यांच्यासह भाजप नेत्यांकडून करण्यात आला होता. त्यानंतर मलिक काही महिने तुरुंगातही होत. तुरुंगातून बाहेर आल्यानंतर ते विधानसभेत आले होते. त्यानंतर फडणवीसांनी अजित पवारांना पत्र लिहून तीव्र नाराजी व्यक्त केली होती. आता पुन्हा एकदा विधानसभा निवडणुकीत मलिकांच्या उमेदवारीमुळे वाद निर्माण झाला आहे.