Manoj Jarange: जरांगेंचा पक्का निर्धार! म्हणाले, आता आरपारची लढाई, राज्य सरकारच नाही तर केंद्रालाही...

Manoj Jarange: मराठा समाजाला ओबीसी प्रवर्गातून आरक्षण मिळावं यासाठी मुंबईतील आझाद मैदानात बेमुदत उपोषणाला बसलेले मनोज जरांगे यांनी यावेळी पक्का निर्धार केला आहे. यावेळी आरपारची लढाई असल्याचं सांगताना याचा फटका केवळ राज्य सरकारलाच नाही तर केंद्र सरकारलाही बसणार असल्याचं त्यांनी म्हटलं आहे.

एकतर सरकार मारणार किंवा मी मरणार - जरांगे

जरांगे म्हणाले, "मी दोन वर्षे मराठा समाजाला तेच सांगायचं काम केलंय की, आपल्या सरकारी नोंदी आहेत आपण कोणाचं घेत नाहीत. हे गरीब ओबीसींनाही कळालं आहे नेते मंडळींना सोडून. आपला जो जीआर आहे १९८९-९० चा याच्या नोंदी या शंभर-दीडशे वर्षांपूर्वीच्या आहेत. त्यामुळं त्यानुसार त्यांना आरक्षण दिलं पाहिजे. पण सरकार दाटून म्हणतंय की, एकाच काढून दुसऱ्याला देणार नाही. काढून घ्यायचा प्रश्नच येत नाही हे पहिलंच आहे आमचं. हे भ्रम निर्माण करत आहेत, पण काही टेन्शन नाही. आता ही फायनल फाईट होणार. आरक्षण घेणार आणि नंतरच मी जाणार. दोन्हींपैकी एकतरी आता होणारच. एकतर सरकार मला गोळ्या घालून मारुन टाकणार नाहीतर मग मी उपोषण करुन मरणार. एकतर आरक्षण घेऊन जाणार हे फायनल होणार आहे आता"

यंदा केंद्र सरकारलाही डाग लागणार

मग आता देवेंद्र फडणवीसांनी ठरवायचं की तुमच्या आडमुठ्यापणामुळं यांना सत्ता मराठ्यांनीच देऊन यांच्या मराठ्यांच्याविरोधातच घेतलेल्या भूमिकेमुळं नरेंद्र मोदी आणि अमित शहा यांना डाग लावायचा की इथल्या सरकारला डाग लावायचा की त्यापेक्षा मराठ्यांना आरक्षण देऊन टाकायचं हे त्यांनीच ठरवायचं. फडणवीसांच्या आडमुठेपणामुळं केंद्रातील सरकारलाही डाग लागणार आहे यावेळेस. कारण राज्यात मराठे ५०-५५ टक्के आहेत. जर वेळ आलीच तर राज्यात मराठे चाक सुद्ध फिरुन देणार नाहीत बेमुदत वर्षानुवर्षे हा दम मराठ्यांमध्ये आहे, अशा शब्दांत मनोज जरांगे यांनी शुक्रवारी संध्याकाळी घेतलेल्या पत्रकार परिषदेत आपला निर्धार जाहीर केला.