Manoj Jarange Patil : मनोज जरांगे देवेंद्र फडणवीसांनाच लक्ष्य का करतात? आझाद मैदानात आलेल्या भाजप आमदारानेच सांगितलं कारण...

Maratha Reservation Protest : मराठा आरक्षणासाठी मुंबईतील आझाद मैदानावर बेमुदत उपोषणासाठी बसलेले मनोज जरांगे पाटील यांची आंदोलनाच्या पहिल्याच दिवशी अनेक नेत्यांनी भेट घेतली.

यामध्ये विरोधकांच्या आमदार खासदारांनी भेट घेतलीच मात्र, सत्ताधारी पक्षातील अनेक नेते देखील जरांगेंना भेटण्यासाठी आले होते. भाजप आमदार सुरेश धस यांनी देखील काल आझाद मैदानावर जरांगे यांची भेट घेतली.

या भेटीनंतर माध्यमांशी बोलताना धस यांनी सांगितलं की, मराठा आरक्षणाच्या मुद्द्यावर मंत्रिमंडळ उपसमितीच्या अध्यक्षांची भेट घेणार असून मुख्यमंत्री आणि दोन्ही उपमुख्यमंत्र्यांची भेट घेऊन आरक्षणाच्या प्रश्नावर लवकरात लवकर तोडगा काढण्यासाठी प्रयत्न करणार आहे.

तसंच आमदार प्रकाश सोळके यांच्यासह इतर लोकप्रतिनिधींना सोबत घेऊन शनिवारी मुख्यमंत्री आणि दोन्ही उपमुख्यमंत्र्यांच्या भेटीला आहे. तर मराठा आरक्षणसाठी मी या आधीही मध्यस्ती केली आणि आताही करून लवकरात लवकर मार्ग काढण्याचा प्रयत्न करणार असल्याचंही धस यावेळी म्हणाले.

शिवाय धस यांनी यावेळी मनोज जरांगे पाटील यांच्या मागण्यांमधील एक निर्णय मान्य केल्याचं सांगितलं. तसंच इतरही मागण्यांवर तोडगा काढण्याचा प्रयत्न केला पाहिजे. कारण मुंबईमध्ये मोठ्या प्रमाणावर लोक आले असून आरक्षणा संबंधित निर्णय झाल्याशिवाय ते माघारी जाणार नाहीत.

या आधीच्या उपोषणामध्ये आपण मध्यस्ती करण्याचं काम केलं होतं. आताही मध्यस्ती करून हा प्रश्न लवकरात लवकर सोडवावा अशी मागणी मुख्यमंत्र्यांना करणार असल्याचंही धस म्हणाले.

दरम्यान, यावेळी पत्रकारांनी जरांगे पाटील नेहमी मुख्यमंत्री फडणवीसांनाच लक्ष्य करतात असं विचारताच सुरेश धस म्हणाले, "कारण मुख्यमंत्री हे राज्याचे प्रमुख असतात आणि याबाबत तेच निर्णय घेणार आहेत. या आधीचे निर्णयही त्यांनीच घेतले होते. त्यांच्याकडून अपेक्षा असल्यामुळेच मनोज जरांगे त्यांच्यावरच बोलणार. ते विरोधी पक्षनेत्यावर कशाला बोलतील?", असं म्हणत त्यांनी फडणवीसांवर जरांगेंनी केलेल्या टिकेवर प्रतिक्रिया दिली.