Mira Bhayandar Election : एकाच घरात ठाकरे-शिंदेंच्या पक्षाचे तिकीट; पतीच्या निर्णयामुळे चित्रच पलटले! 'मशाल' चिन्हच गायब!

प्रकाश लिमये

Mira Bhayandar News : मिरा भाईंदर महानगरपालिकेच्या निवडणुकित पती पत्नीच्या चार जोड्या उतरल्या होत्या. त्यात शिंदे गटाकडून दोन व उबाठा गटाकडून एक जोडपे रिंगणात होते. मात्र एका जोड्याने तर आपसात विस्तव जात नसलेल्या शिवसेना शिंदे गट व शिवसेना ठाकरे गट या दोन्ही पक्षाकडून उमेदवारी मिळवण्याची किमया केली होती.

भाईंदर पूर्व प्रभाग १० मधून पती आस्तिक म्हात्रे यांनी ठाकरे गटाकडून तर त्यांच्या पत्नी ममता म्हात्रे यांनी शिंदे गटाकडून प्रभाग ११ मध्ये उमेदवारी मिळवली होती. त्यामुळे हे जोडपे चांगलेच चर्चेत आले होते.

मात्र माघार घेण्याच्या आदल्या दिवशी अचानक चक्रे फिरली. त्यामुळे उमेदवारी अर्ज मागे घेण्याच्या शेवटच्या दिवशी ठाकरे गटाचे आस्तिक म्हात्रे यांनी चक्क निवडणुकीतून माघार घेतली. त्यामुळे ठाकरे गटाला धक्का बसला आहे. त्यांच्या पत्नी ममता म्हात्रे या मात्र शिंदे गटाकडून प्रभाग ११ मध्ये निवडणुक लढवत आहेत.

माजी नगरसेविका वंदना पाटील यांच्यासोबत त्यांचे पती विकास पाटील यांनी देखील शिवसेनेकडून उमेदवारी अर्ज दाखल केला होता तर शिवसेनेचे जिल्हाध्यक्ष व माजी नगरसेवक राजू भोईर हे यावेळी देखील आपल्या पत्नीसह निवडणूकीच्या रिंगणात अतरले होते. शिवसेनेकडून माजी नगरसेविका तारा घरत व त्यांचा मुलगा पवन घरत या आई व मुलाच्या जोडीला उमेदवारी देण्यात आली आहे.