Uddhav Thackeray News : ठाकरेंच्या मक्तेदारीला सुरूंग, मुंबईत भाजप महायुतीचा झेंडा

Mumbai News : विधानसभा निवडणुकीनंतर मुंबई किसकी? या प्रश्नाचे उत्तर मिळाले आहे. या निवडणुकीच्या निकालानंतर मुंबईतील उद्धव ठाकरे यांची मक्तेदारी मोडीत निघाली आहे. भाजप महायुतीने ठाकरेंच्या मक्तेदारीला सुरूंग लावला आहे.

मुंबईवर भाजप महायुतीचा झेंडा फडकलाय. महायुतीला मुंबईत 22 जागा जिंकल्या असून, त्यात भाजपला 15 जागा यश मिळाले आहेत. या यशाबरोबर भाजपने लोकसभा निवडणुकीतील अपयशाचा शिक्का पुसून टाकला आहे.

मुंबईत 36 मतदारसंघ आहेत. या मतदारसंघापैकी 22 जागांवर महायुतीने यश मिळवले आहे. यात 22 जागापैंकी भाजपने 15, तर सहा जागांवर एकनाथ शिंदे यांच्या शिवसेना पक्षाने जिंकल्या आहेत. अजित पवार यांच्या राष्ट्रवादी काँग्रेसने एक जागा जिंकली आहे. महाविकास आघाडीने मुंबईत 14 जागांवर यश मिळवले आहे. यात शिवसेना उद्धव बाळासाहेब ठाकरे (Uddhav Thackeray) पक्षाने दहा जागा जिंकल्यात. काँग्रेसने तीन, तर समाजवादी पक्षाने एक जागा जिंकली आहे.

मलबार हिल मतदारसंघातून भाजपचे (BJP) मंगलप्रभात लोढा सातव्यांदा विजयी झालेत. त्यांना 72 टक्क्यांहून अधिक मते मिळालीत. कालिदास कोळंबकर नायगावमधून नवव्यांदा विजयी झाले. मुंबईचे भाजपचे शहराध्यक्ष आशिष शेलार वांद्रे पश्चिम मतदारसंघातून 19 हजार 931 मते घेत जिंकले. विधानसभा अध्यक्ष राहुल नार्वेकर, कांदिवलीतून अतुल भातखळवकर, चारकोपमधून योगेश सागर, विलेपार्लेतून पराग अळवणी, गोरेगावमधून विद्या ठाकूर यांनी विजय मिळवला आहे. अजित पवार यांच्या राष्ट्रवादी काँग्रेसला सना मलिक यांच्या रुपाने मुंबईत एकच जागा जिंकता आली.

काँग्रेसचे मालाड पश्चिममधून अस्लम शेख, धावीतून ज्योती गायकवाड, मुंबादेवीतून अमीन पटेल विजयी झाले आहेत. शिवसेना उद्धव ठाकरे पक्षाचे दहा जागांवर विजय मिळवला आहे. माहीम, शिवडी आणि वरळीमध्ये अटीतटीची लढत झाली. वरळीत आदित्य ठाकरे यांनी नेटाने निवडणूक लढली. परिणामी ते विजयी झाले. माहीममध्ये महेश सावंत यांनी अमित ठाकरे आणि सदा सरवणकर यांना हरवले. शिवडीमधून अजय चौधरी यांचा विजय झाला. वांद्रे पूर्वमध्ये वरुण सरदेसाई यांनी विजय मिळवला.

एकनाथ शिंदे यांच्या शिवसेना पक्षातून चांदिवली मतदारसंघातून दिलीप लांडे, मागाठाणेतून प्रकाश सुर्वे यांचा विजय झाला. दक्षिण मुंबईतून यामिनी जाधव यांचा पराभव झाला. मनसेचे अध्यक्ष राज ठाकरे यांचे पुत्र अमित ठाकरे यांचा या निवडणुकीत पराभव झाला. ते तिसऱ्या क्रमांकावर राहिले. अजित पवार यांच्या राष्ट्रवादी काँग्रेसचे नवाब मलिक यांना अणुशक्तीनगर मतदारसंघात पराभवाला समोरे जावे लागले.

लोकसभा निवडणुकीत महायुतीला मोठे यश मिळाले होते. महायुतीचे उमेदवार पियूष गोयल उत्तर मुंबईतून, तर एकनाथ शिंदे यांच्या शिवसेनेचे उमेदवार रवींद्र वायकर हे वायव्य मुंबईतून विजयी झाले होते. महाविकास आघाडीने सहापैकी चार जागांवर यश मिळवले होते. मात्र विधानसभा निवडणुकीत महायुतीने अपयश धुऊन काढत मुंबईतील उद्धव ठाकरे यांच्या मक्तेदारीला सुरूंग लावला.