Nana Patole News : मुंबईतील 'इंडिया'च्या बैठकीतून 'मोदी सरकार चले जाव' चा नारा दिला जाणार

Mumbai News : देशातील विरोधी पक्षांच्या 'इंडिया' आघाडीची तिसरी बैठक मुंबईत ३१ ऑगस्ट व १ सप्टेंबरला होणार आहे. महात्मा गांधी यांनी ब्रिटिश सत्तेला मुंबईतूनच 'चलो जाव' चा नारा दिला होता, तसाच मोदी सरकारलाही मुंबईतील 'इंडिया'च्या बैठकीतून 'चले जाव'चा नारा दिला जाईल, असे काँग्रेसचे प्रदेशाध्यक्ष नाना पटोले (Nana Patole) यांनी आज (ता.२८) मुंबईत सांगितले.

'एनडीए'तील काही पक्ष हे इंडिया आघाडीत सहभागी होऊ शकतात, असा दावा पटोलेंनी यावेळी केला. इंडिया आघाडीकडे पंतप्रधानपदासाठी अनेक सक्षम उमेदवार आहेत, तर, भाजपकडे नाही, असे सांगत नरेंद्र मोदींना जनता कंटाळली आहे, असे ते म्हणाले. पंतप्रधानपदाचा उमेदवार कोण असेल यावर आघाडी निर्णय घेईल, पण काँग्रेसचा कार्यकर्ता म्हणून राहुल गांधी (Rahul Gandhi) हे पंतप्रधान व्हावेत भावना त्यांनी बोलून दाखवली.

'शासन आपल्या दारी' उपक्रमातून जनतेच्या पैशाची लुट चालली असल्याचा आरोप त्यांनी केला. जेथे हा कार्यक्रम होतो, तेथील जनता सरकारबद्दल तीव्र नाराजी व्यक्त करते, असेही ते म्हणाले. राष्ट्रवादी काँग्रेसमधून (NCP) उपमुख्यमंत्री अजित पवार (Ajit Pawar) यांच्याबरोबर काही सहकारी राज्यातील युतीच्या सत्तेत विकासासाठी सहभागी झाले नसून 'ईडी'च्या धाकाने ते सामील झाले आहेत, असे पटोले यावेळी म्हणाले. कारण हेच लोक मागील अनेक वर्षांपासून सत्तेत होते, मग आतापर्यंत त्यांनी विकास का केला नाही, अशी विचारणा त्यांनी केली.

मुंबई-गोवा महामार्गाचे काम जवळपास १७ वर्षांपासून सुरु असूनही ते पूर्ण झालेले नाही. कारण त्याला भ्रष्टाचाराची कीड लागली असून भाजपची (BJP) मंडळी या रस्त्याच्या कंत्राटात भागीदार आहेत, असा सनसनाटी आरोप त्यांनी केला. तसेच कमीशनच्या वादातून हा रस्ता पूर्ण होत नाही. म्हणून अनेक कंत्राटदार काम सोडून पळून गेले. त्याचा फटका, मात्र कोकणच्या लोकांना बसत आहे, असे ते म्हणाले. उच्च न्यायालयाच्या न्यायमूर्तीकडून मुंबई-गोवा महामार्गाच्या कामाची चौकशी करण्याची मागणी त्यांनी केली.

Edited by : Amol Jaybhaye