Top Ministers : मुख्यमंत्री फडणवीसांच्या लाडक्या मंत्र्यांची कामगिरी दमदार, शिंदे-पवारांच्या शिलेदारांना टक्कर

Government Report Card : राज्यात नवीन महायुती सरकार स्थापन झाल्यानंतर शासनाच्या सर्व 48 विभागांनी 100 दिवसांचा धोरणात्मक बाबींचा कार्यक्रम हाती घेऊन महत्त्वाची नवीन धोरणे, दूरगामी निर्णय व लोकाभिमुख उपक्रमांची आखणी सुरू केली होती. मागील 100 दिवसातील कामगिरीमध्ये आदिती तटकरे यांच्या महिला आणि बालविकास विभागने बाजी मारली आहे. विशेष म्हणजे उत्कृष्ट काम करणाऱ्या पहिल्या पाच विभागामध्ये फडणवीसांच्या दोन लाडक्या मंत्र्‍यांच्या विभागांचा देखील सहभाग आहे.

मंत्री जयकुमार गोरे यांच्या ग्रामविकास विभागाने तसेच मंत्री नितेश राणे यांच्या बंदरे विभागाने उत्कुष्ट काम करणाऱ्या पहिल्या पाच विभागामध्ये स्थान मिळवले आहे. जयकुमार गोरे यांचा ग्रामविकास विभाग चौथ्या स्थानावर आहे तर नितेश राणे यांचा विभाग पाचव्या स्थानावर आहे. कामगिरीमध्ये 100 गुणांपैकी अनुक्रमे 63.85 आणि 61.28 गुण मिळाले आहेत. त्यामुळे कामगिरीच्या बाबत हे दोन्ही मंत्री अजित पवार आणि एकनाथ शिंदेंच्या शिलेदारांन चांगलीच टक्कर देताना दिसून येत आहेत.

नितेश राणे यांना पहिल्यांदाच मंत्रिमंडळात स्थान मिळाले आहे. मात्र, त्यांच्या प्रशोभक वक्तव्यामुळे अनेकदा सरकारवर टीका करण्यात येते. त्यावर माझा बाॅस फडणवीस आहेत, असे उत्तर देत राणे त्यांच्यावर होणाऱ्या टीकेला प्रत्युत्तर देत असतात. त्यामुळे 100 दिवसांध्ये त्यांच्या विभागाची कामगिरी कशी असेल याची चर्चा होती. त्यात त्यांच्या बंदरे विभागाची कार्यालयीन कामकाज आणि त्यांनी दिलेली उदिष्टे त्यांनी चांगल्या प्रकारे पूर्ण केल्याचे दिसते.

सर्वोत्तम महानगरपालिका आयुक्त

100 दिवसांची कार्यालयीन सुधारणा विशेष मोहिमेमध्ये सर्वोत्तम आयुक्त उल्हानगर महापालिकेचे आयुक्त ठरले आहेत. त्यांना 100 पैकी 86.29 गुण मिळाले आहेत. तर, दुसऱ्या स्थानावर पिंपरी-चिंचवड महापालिकेचे आयुक्त आहेत. त्यांना 85.71 गुण आहेत. तिसऱ्या स्थानावर पनवेल महापालिका आयुक्त तर चौथ्या स्थानावर नवी मुंबईचे महापालिका आयुक्त आहेत.

सर्वोत्तम पोलिस आयुक्त

सर्वोत्तम पोलिस आयुक्तांमध्ये मीरा-भाईंदरचे पोलिस आयुक्त हे पहिल्या क्रमांकावर आहेत. तर, ठाणे पोलिस आयुक्त दुसऱ्या स्थानावर आहेत. तसेच मुंबई रेल्वे पोलिस आयुक्त तिसऱ्या स्थानावर आहेत.