Palghar loksabha News : अर्ज भरताना हेमंत सावरांचे शक्तिप्रदर्शन; पण मुख्यमंत्र्यांसह खासदारांची दांडी

Virar News : उमेदवारी अर्ज भरण्याच्या पूर्वसंध्येला भाजपने विद्यमान खासदार राजेंद्र गावित यांचा पत्ता कट करत दिवंगत विष्णू सावरा यांचे सुपुत्र डॉ. हेमंत सावरा यांना उमेदवारी जाहीर केली आहे. मात्र या अनपेक्षित घोषणेमुळे भाजपसह शिवसेना ( बाळासाहेब ठाकरे) कार्यकर्त्यांनाही धक्का बसला आहे. भाजपच्या उमेदवार मतचाचणीत डॉ. हेमंत सावरा यांचे नाव होते. या सगळ्या पार्श्वभूमीवर डॉ. हेमंत सावरा यांच्या दाखल झालेल्या उमेदवारी अर्जादरम्यान पालकमंत्री रवींद्र चव्हाण काही वेळ हजर होते .

भाजपने मोठे शक्तिप्रदर्शन केले असले तरी राज्यात ठिकठिकाणी उमेदवारी अर्ज दाखल करताना असणारे राज्यातील मोठ्या नेत्यांनी पाठ फिरवल्यानेअनेक तर्कवितर्क करण्यात येत होते. विशेष म्हणजे डॉ. हेमंत सावरा यांचा अर्ज दाखल करताना प्रोटॉकॉलप्रमाणे मुख्यमंत्री एकनाथ शिंदे यांनी हजर राहणे अपेक्षित होते. मात्र त्यांची अनुपस्थिती प्रकर्षाने दिसून आली.

ऐन वेळी उमेदवारी गेल्याने राजेंद्र गावितही या वेळी उपस्थित राहिले नाहीत. पालघर लोकसभेसाठी महायुतीत शेवटपर्यंत सस्पेन्स राहिला होता. उमेदवारी अर्ज दाखल करण्यास एक दिवस बाकी असताना हि जागा भाजपला सोडल्याचे जाहीर झाले. परंतु उमेदवाराचे नाव मात्र, काल रात्री ९ वाजता जाहीर करण्यात आल्याने महायुतीत पालघरमध्ये सर्व काही आलबेल नसल्याचे संकेत मिळत होते.

भाजपच्या डॉ. हेमंत सावरा यांना उमेदवारी जाहीर झाल्यानंतर राजेंद गावित यांनी आपली नाराजी लपविली नाही. तसेच ते उमेदवारी अर्ज दाखले करण्यास हि आले नाहीत. त्यामुळे गावितांच्या नाराजीचा फटका महायुतीला बसतो का, हे पाहणे औत्सुक्याचे ठरणार आहे.

(राजकारणातील महत्त्वाच्या बातम्यांचे अपडेट्ससाठी सरकारनामाचे अधिकृत WhatsApp चॅनल फॉलो करा!)

एकनाथ शिंदे गटाला ही जागा मिळाली नसली तरी आज भाजपतर्फे उमेदवारी अर्ज भरण्याच्या वेळी माजी जिल्हाप्रमुख वसंत चव्हाण, जिल्हाप्रमुख कुंदन संखे तसेच आरपीआयचे कार्यकर्ते मोठ्याप्रमाणात पस्थित होते.

Edited By : Umesh Bambare