Raj-Uddhav Thackeray Alliance : राज-उद्धव ठाकरेंना रोखण्यासाठी 'मास्टर प्लॅन'! विधानसभेसाठी वापरलेला 'तो' डाव भाजप टाकणार!

BJP Politics : राज ठाकरे-उद्धव ठाकरे यांच्यामध्ये युती अजून झालेली नाही. मात्र, उद्धव ठाकरेंनी युतीबाबतचे स्पष्ट संकेत दिले आहेत. मनसेचे तीन दिवशीय शिबिर नाशिकमध्ये होत आहे. तेथे राज ठाकरे युतीबाबत पदाधिकाऱ्यांशी चर्चा करून निर्णय घेण्याची शक्यता आहे. दोन्ही ठाकरे बंधू एकत्र येत असताना भाजप आणि एकनाथ शिंदेंच्या शिवसेना त्यांना रोखायचे कसे याचा मास्टर प्लॅन तयार करत आहे.

नोव्हेंबर-डिसेंबरमध्ये महापालिका निवडणूक होण्याची शक्यता वर्तवली जात आहे. मात्र, ज्या प्रकारे गेल्यावर्षी हरियाणासोबत महाराष्ट्राची विधानसभा निवडणूक ऑक्टोबर महिन्यात घेण्यात आली नाही. सरकार उशीरा स्थापन झाल्याचे कारण देत निवडणूक 20 नोव्हेंबरला झाली. तर, हरियाणा विधानसभा निवडणूक पाच ऑक्टोबरला झाली. महाराष्ट्राच्या निवडणुकीसाठी महायुतीला प्रचाराची रणनीती राबवण्यासाठी दोन महिन्याचा जास्त कालावधी मिळाला. अगदी त्याच प्रमाणे मुंबई महापालिकेची निवडणूक या वर्षी न घेता तू पुढील वर्षी घेण्याचा भाजपचा प्लॅन असल्याची चर्चा आहे.

मुंबईसह काही महापालिकेच्या निवडणूक जर पुढील वर्षी झाल्या तर महायुतीला आपली रणनीती राबवण्यास वेळ मिळेल. आणि ठाकरे बंधूविषयी निर्माण झालेली सहानुभूती देखील कमी होईल. तसेच मराठी-हिंदी वादाचा मुद्दा देखील मागे पडले, असा राजकीय तज्ज्ञांचा अंदाज आहे.

राज्यातील स्थानिक स्वराज संस्थाच्या निवडणुका या केंद्रीय निवडणूक आयोगाकडून नाही तर महाराष्ट्र राज्य निवडणूक आयोगाकडून घेतल्या जातात. आयोगाकडे येवढे मनुष्यबळ नाही की ते संपूर्ण राज्यातील जिल्हा परिषद, पंचायत समित्या आणि महानगरपालिकेच्या निवडणुका एकत्र घेऊ शकेल. त्यामुळे चार ते पाच टप्प्यांमध्ये या निवडणुका होण्याची शक्यता आहे. त्यात मुंबई महापालिकेची निवडणूक ही शेवटच्या टप्प्यात म्हणजे पुढील वर्षी झाली तर ठाकरे बंधूंसमोर भाजपच्या रणनीतीचे मोठे आवाहन असणार आहे.

बिहार निवडणुकीसाठी हिंदीचा मुद्दा तापवला

मुंबईत मराठीचा मुद्दा हा केंद्रस्थानी आला आहे. हिंदी सक्तीचा मुद्दा हा भाजपने हिंदी मतदारांना डोळ्यासमोर ठेऊन घेतला होता. मात्र, त्याला होणार विरोध पाहाता त्यांनी जीआर रद्द करून दोन पावले मागे घेतली आहेत. मात्र, मराठीच्या मुद्यावरून ठाकरे बंधू आक्रमक होत असताना हिंदीचा मुद्दा पेटता ठेवणे भाजपसाठी बिहार विधानसभेच्या दृष्टिने महत्त्वाचे आहे. त्यामुळे हिंदीला होत असलेला ठाकरे बंधूकडून विरोध तसेच हिंदी भाषिक नागरिकांवर मुंबईमध्ये ठाकरे बंधूकडून मराठी बोलण्याची सक्ती हे मुद्दे भाजप बिहार विधानसभेत वापरण्याची शक्यता आहे. उद्धव ठाकरे हे हिंदीला विरोध करतात आणि काँग्रेस त्यांच्यासोबत महाविकास आघाडीत आहे, हा देखील बिहारच्या प्रचारात भाजप प्रमुख मुद्दा बनवण्याची शक्यता आहे.