Sanjay Gaikwad : मी साऊथच्या लोकांना मारलं; त्यांनीच महाराष्ट्र नाचवलाय, मग पुळका कशाला? संजय गायकवाडांकडून मारहाणीचं समर्थन

Mumbai News, 10 Jul : एकनाथ शिंदेंच्या शिवसेनेचे आमदार संजय गायकवाड यांनी आमदार निवासातील कॅन्टीनमध्ये निकृष्ट दर्जाचे जेवण दिले म्हणून कॅन्टीनमधील कर्मचाऱ्याला बेदम मारहाण केल्याचा व्हिडीओ समोर आला आहे.

या प्रकरणावरून राज्यातील राजकारण चांगलंच तापलं असून आता विरोधकांनी आमदार गायकवाड यांच्यावर कठोर कारवाई करण्याची मागणी थेट विधीमंडळाच्या सभागृहात केली आहे. यावर मुख्यमंत्री देवेंद्र फडणवीस आणि उपमुख्यमंत्री एकनाथ शिंदे यांनी गायकवाड यांनी केलेली मारहाण चुकीचं असल्याचं म्हटलं आहे.

मात्र, संजय गायकवाड यांनी मी केलं ते चांगल्यासाठी आणि महाराष्ट्रातील लोकांसाठी केल्याचा अजब दावा केला आहे. तर विरोधकांना साऊथ इंडियन लोकांचा इतका पुळका का? असा सवाल उपस्थित केला आहे.

संजय गायकवाड नेमकं काय म्हणाले?

कॅन्टीनमधील कर्मचाऱ्याला मारहाण केल्याचं समर्थन करताना गायकवाड म्हणाले, "मी ज्याला मारहाण केली तो वेटर नव्हता तर तो मॅनेजर होता. आता त्याला मालकाने सस्पेंड केलं आहे. तो लाखो लोकांच्या आरोग्याशी खेळत होता. मला स्वतःला पोटाचा आजार आहे.

मी 20 वर्षांपासून पोटाच्या आजाराने त्रस्त आहे आणि ते जर मला विषारी जेवण देणार असतील आणि मला जर काही त्रास होणार असेल तर माझी रिअ‍ॅक्शन चुकीची नव्हती. माझा मार्ग चुकीचा आहे पण माझ्या कृतीमुळे येणाऱ्या काळात लाखो महाराष्ट्रातील नागरिकांचं आरोग्य वाचणार आहे.

शिवाय ही छोटीशी मारहाण आहे. मला सगळे कायदे माहिती आहेत. हा फक्त एनसी मॅटर आहे, असं म्हणत त्यांनी आपल्या कृतीचं समर्थन केलं. दरम्यान, यावेळी त्यांनी थेट साऊथ इंडियन लोकांचा विरोधकांना पुळका का? असा सवाल उपस्थित केला. विरोधक माझ्यावर टीका करत आहेत.

मात्र, मला त्यांना सांगायचं आहे की हे साऊथचे लोक आहेत. या लोकांनी तुमचा महाराष्ट्र नाचवला. सगळ्या लेडीज बारमध्ये महाराष्ट्राची तरुणाई बरबाद केली. महाराष्ट्राचं कल्चर खराब केलं. आज तुम्हाला त्यांचा इतका पुळका का? मी जे केलं ते महाराष्ट्रातल्या सगळ्या लोकांसाठी केलं, असा अजब दावा गायकवाड यांनी केला आहे.