CM Eknath Shinde : 'मदतीचा हात एकनाथ' या फलकातून घटनाबाह्य मुख्यमंत्र्यांचा पुन्हा एकदा खोटारडेपणा; आदित्य ठाकरे कडाडले !

Mumbai News : मुख्यमंत्री एकनाथ शिंदे यांचे मुंबईसह राज्यात 'मदतीचा हात एकनाथ', असे फलक लागले असून त्यावर युवा सेनेचे प्रमुख आदित्य ठाकरे यांनी निशाणा साधला. 'घटनाबाह्य मुख्यमंत्र्यांचा आणखी एक खोटारडेपणा फलकातून समोर येऊ लागला आहे', असा मार्मिक टोला आदित्य ठाकरे यांनी लगावला.

आदित्य ठाकरे विधिमंडळाच्या कामकाजात सहभागी होण्यासाठी सोमवारी दुपारी मंत्रालयात दाखल झाले. यावेळी त्यांनी माध्यमांशी संवाद साधला.महायुती सरकारने माझी लाडकी बहीण ही योजना जाहीर केली. उपमुख्यमंत्री तथा अर्थमंत्री अजित पवार यांनी माझी लाडकी बहीण योजनेची घोषणा केली. मुख्यमंत्री एकनाथ शिंदे यांनी मंत्रिमंडळाची बैठक घेऊन या योजनेचा अध्यादेश काढला. यावरून विरोधक चांगलेच आक्रमक झाले आहेत. यातच मुख्यमंत्री एकनाथ शिंदे यांचे मुंबईसह राज्यभरात 'मदतीचा हात एकनाथ', असे फलक झळकले आहेत.

यावर शिवसेना उद्धव बाळासाहेब ठाकरे पक्षाचे युवा सेनेचे प्रमुख आदित्य ठाकरे (Aditya Thackeray) यांनी मुख्यमंत्री एकनाथ शिंदे यांच्यावर निशाणा साधला. मुख्यमंत्री शिंदे, असे फलक लावून त्यांचा खोटारडेपणा पुन्हा एकदा जाहीर करत आहेत. अर्थसंकल्प सादर केल्यानंतर लगेचच योजनेचा अध्यादेश काढला. त्यामुळे ही योजनेचे भवितव्य कसे असेल हे त्यांनाच माहीत.दहीहंडी उत्सवाला विमा संरक्षण देण्याची घोषणेत देखील खोटारडेपणा केला. या घटनाबाह्य सरकारमध्ये सर्वकाही खोटारडेपणावर सुरू असल्याचा टोला आदित्य ठाकरे यांनी लगावला.

मुख्यमंत्री माझी लाडकी बहीण योजनेद्वारे राज्यभरातील लाभार्थी महिलांना प्रति महिना दीड हजार रुपये मिळणार आहेत. या योजनेचा मंत्रिमंडळात अध्यादेश निघताच सर्वत्र फलक लागलेत. या फलकांवर मुख्यमंत्री एकनाथ शिंदे (Eknath Shinde) यांना प्रेझेंट करण्यात आले आहे. आगामी विधानसभा निवडणुकीच्या दृष्टीने महायुतीत मुख्यमंत्रीपदाचा चेहरा एकनाथ शिंदे असेल, असे हे फलक राज्यभर लावण्यात आले आहेत. मुख्यमंत्री एकनाथ शिंदे यांना पुन्हा मुख्यमंत्री पदासाठी प्रेझेंट केले जात असल्याची चर्चा आहे. या चर्चेच्या अनुषंगाने आदित्य ठाकरे यांनी दिलेली प्रतिक्रिया चांगलीच चर्चेत आली आहे.

(Edited by : Chaitanya Machale)