मामी गप्प बसा! अमृता फडणवीस अन् मनीषा कायंदे यांच्यात जुंपली

मुंबई : शिवसेना (Shivsena) नेते व खासदार संजय राऊत (Sanjay Raut) यांनी भाजपचे (BJP) नेते माजी मुख्यमंत्री देवेंद्र फडणवीस, किरीट सोमय्या यांच्यासह इतर नेत्यांना लक्ष्य केले आहे. यावरून शिवसेना विरुद्ध भाजप असा वाद पुन्हा पेटला आहे. या वादात फडणवीसांच्या पत्नी अमृता फडणवीस (Amruta Fadnavis) यांनी उडी घेतली होती. याला आता शिवसेनेच्या आमदार मनिषा कायंदे (Manisha Kayande) यांनी उत्तर दिले आहे.

संजय राऊत यांची पत्रकार परिषद होताच अमृता फडणवीसांनी ट्विट करीत निशाणा साधला. आज फिर एक बिल्ली ने दहाड़ने की कोशिश की है, असे ट्विट त्यांनी केले. त्यांचा रोख राऊतांवर होता. याला लगेचच शिवसेनेच्या मनिषा कायंदे यांनी प्रत्युत्तर दिले. त्यांनी अमृता फडणवीसांचे नाव न घेता म्हटले आहे की, शेर की दहाड से डरी हूई बिल्लीया आवाज निकालाने की कोशीष कर रही है। मामी गप्प बसा!

खासदार राऊत यांनी आज पत्रकार परिषदेत सोमय्यांचा पर्दाफाश केला. ते म्हणाले की, निकॉन इन्फ्रा कन्स्ट्रक्शन कंपनी कुणाची आहे? ही कंपनी किरीट सोमय्या, त्यांचे कुटुंबीय आणि त्यांचा मुलगा नील यांची आहे. त्यांचा भागीदार पीएमसी बँक गैरव्यवहारातील आरोपी राकेश वाधवा आहे. पीएमसी गैरव्यवहारातील पैशाची गुंतवणूक त्याने केली. यातून वसई तालुक्यातील गोखीवरे येथे हजारो कोटींचा प्रकल्प उभारण्यात आला. पीएमसी बँक गैरव्यवहार प्रकरणी सोमय्यांनी ब्लॅकमेल करून कोट्यवधीची जमीन घेतली. देवेंद्र लधाणी या फ्रंटमनच्या नावावर ही जमीन घेण्यात आली आणि पैसेही घेण्यात आली. चारशे कोटींची जमीन फक्त साडेचार कोटींना घेण्यात आली. एकूण दोन जमिनी घेण्यात आल्या.दुसरी जमीन सात कोटींनी घेण्यात आली.

या जमिनीवर जो प्रकल्प उभा आहे, त्या कंपनीचा संचालक नील सोमय्या आहे. निकॉन फेज 1 फेज 2 हे हजारो कोटींचे प्रकल्प उभारले आहेत. हा सगळा पैसा पीएमसी बँकेतील आहे. या प्रकल्पाला पर्यावरण विभागाची मंजुरी नाही. हरित लवादाने यात लक्ष घातल्यास दोनशे कोटींचा दंड होऊ शकतो. यात पर्यावरण मंत्री आदित्य ठाकरे यांनी ताबडतोब लक्ष घालावे, असे माझे आवाहन आहे. सगळ्या प्रकल्पाचे परवाने रद्द करावेत. पीएमसी गैरव्यवहाराचा तपास करणाऱ्या आर्थिक गुन्हे शाखेने किरीट अन् नील सोमय्याला ताबडतोब अटक करावी, असेही त्यांनी सांगितले.

पीएमसी गैरव्यवहार आधीच माहिती सोमय्याच्या जवळच्या लोकांनी आधीच पैसे काढून घेतले. हा सोमय्या भाजपचा मुंबईतील चेहरा आहे. तो आता भ्रष्टाचारा विरोधात लढाई लढत आहे. पत्रा चाळीतले पैसेही सोमय्यांच्या कंपनीत गेले. याची सगळी चौकशी महाराष्ट्राच्या मुख्यमंत्र्यांनी करावी. हे सगळे मी पाच टक्के सांगितले आहे. बाकीचे पेपर मी ईडीकडे पाठवले आहेत. सोमय्यांचे भ्रष्टाचाराचे सगळे कागद मी तीन वेळा ईडीला पाठवले आहेत, असेही त्यांनी स्पष्ट केले.