राहुल क्षीरसागर
Manoj Pradhan News : देशपातळीवरील व्होटचोरीचा प्रकार उघडकीस आलेला असतानाच आता ठाण्यात चक्क मतदार पळवा-पळवी उघडकीस आली आहे. मतदार ज्या प्रभागात आहे. त्या प्रभागात मतदान करण्याचा मतदारांचा हक्क हिरावून तो दुसर्‍या प्रभागात वर्ग केला असल्याचा प्रकार राष्ट्रवादी काँग्रेस-शरदचंद्र पवार पक्षाचे ठाणे जिल्हाध्यक्ष मनोज प्रधान यांनी उघडकीस आणला आहे. दरम्यान, या संदर्भातील सर्व पुरावे सोमवारी निवडणूक अधिकाऱ्यांना सादर करणार आहोत. त्यानंतरही दुरूस्ती केली नाही तर संबधित अधिकाऱ्यांना काळे फासू, असा इशाराही प्रधान यांनी दिला.
ठाणे महानगरपालिकेच्या निवडणुका लवकरच घेतल्या जाणार आहेत. या निवडणुकांच्या अनुषंगाने मतदार याद्या अद्ययावत करण्याचे काम हाती घेण्यात आले आहे. प्रारूप मतदार याद्या जाहीर करण्यात आल्या असून त्यामध्येच घोळ घातला असल्याचा प्रधान यांनी आरोप केला आहे.
मनोज प्रधान यांनी सांगितले की, राबोडी प्रभाग क्रमांक 10 मध्ये गेल्या अनेक निवडणुकीत समाविष्ट असलेल्या बापूजी नगर येथील मतदारांना प्रभाग क्रमांक 11 मध्ये वर्ग करण्यात आले आहे. हे करीत असताना भूभाग मात्र प्रभाग क्रमांक 10 मध्येच ठेवण्यात आला आहे. म्हणजेच, प्रभाग क्रमांक 10 मध्ये राहणाऱ्या 2680 मतदारांना प्रभाग क्रमांक 11 मधील उमेदवारांसाठी मतदान करावे लागणार आहे. यामागे सत्ताधारी वर्गाचा प्रशासनावर असलेला दबाव कारणीभूत आहे.
राबोडी भागात क्लस्टर डेव्हलपमेंट करण्यात येणार आहे. त्यास बापूजी नगरमधील नागरिकांचा विरोध आहे. त्यामुळेच त्यांना प्रभाग क्रमांक 10 मधून प्रभाग क्रमांक 11 मध्ये हाकलण्यात आले आहे, असा आरोप देखील त्यांनी केला आहे. तर, जतीन कोठारे यांनी, अनेक मतदारांचे फोटो आणि नावे गायब करण्यात आलेली आहेत. त्यामुळे बोगस मतदानाची शक्यता बळावली आहे, असे सांगितले.
दरम्यान, हा प्रकार व्होटचोरीप्रमाणेच गंभीर आहे. सत्ताधाऱ्यांना नको असलेले मतदार भलतीकडेच वर्ग करायचे किंवा विरोधकांना सकारात्मक असलेले मतदार सत्ताधारी उमेदवाराला फायदेशीर ठरतील, या प्रकारे पळवायचे, असा कट प्रशासनाने सत्ताधाऱ्यांच्या सांगण्यावरून केला आहे. जर, अशा पद्धतीने निवडणुका घेण्यात येणार असतील तर लोकशाहीचे अस्तित्व राहिल का? असा सवाल करून अंतिम मतदारयादीत फेरबदल न केल्यास राष्ट्रवादी काँग्रेस-शरदचंद्र पवार पक्ष तीव्र जनआंदोलन उभे करेल, असा इशाराही मनोज प्रधान यांनी दिला आहे.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.