Sharad Pawar VS Ajit Pawar: अजितदादांची नवी चाल; शरद पवार गटातील आमदारांना अपात्र ठरवण्याची केली मागणी

Mumbai News: उपमुख्यमंत्री अजित पवार यांच्या बंडानंतर राष्ट्रवादी काँग्रेस पक्षात फूट पडली. त्यानंतर राष्ट्रवादीत शरद पवार गट आणि अजित पवार गट असे दोन गट पडले. त्यानंतर अजित पवारांच्या गटाकडून पक्ष आणि चिन्हावरही दावा सांगण्यात आला. त्यामुळे दोन्ही गटातील संघर्ष थेट निवडणूक आयोगापर्यंत गेला. असे असतानाच आता शरद पवार गटातील आमदारांविरोधात अजित पवार गट आक्रमक झाला आहे.

राष्ट्रवादीच्या शरद पवार गटातील आमदारांनी पक्ष विरोधी कृत्य केल्याने त्या आमदारांना अपात्र करण्यात यावं, यासंदर्भातील याचिका अजित पवार गटाकडून विधिमंडळात दाखल करण्यात आली असल्याची माहिती सूत्रांनी दिली आहे. तसेच आपणच मूळ राष्ट्रवादी असल्याचा दावाही अजित पवार गटाने केला आहे.

पक्ष विरोधी कृत्य करणाऱ्या राष्ट्रवादीच्या शरद पवार गटातील आमदारांना तत्काळ निलंबित करण्यात यावे, अशी मागणी मूळ राष्ट्रवादी म्हणून अजित पवार गटाने विधिमंडळाच्या अध्यक्षांकडे केली आहे. त्यामुळे आता राष्ट्रवादी काँग्रेसच्या दोन्ही गटातील संघर्ष आणखी वाढण्याची चिन्हं निर्माण झाले आहे.

दरम्यान, अजितदादांच्या गटाने ही नवी खेळी खेळल्याने आता राष्ट्रवादीतील दोन्ही गटात राजकारण तापण्याची शक्यता असून यावर शरद पवार गट काय प्रतिक्रिया देणार, याकडे सर्वांचे लक्ष लागले आहे.

Edited By- Ganesh Thombare