Uddhav Thackeray : "खोके सरकारच्या निरोपाचं अधिवेशन", उद्धव ठाकरेंची जळजळीत टीका

राज्य विधिमंडळांचे गुरूवारपासून पावसाळी अधिवेशन सुरू होत आहे. काही महिन्यांतच विधानसभा निवडणूक लागण्याची शक्यता आहे. त्यापार्श्वभूमीवर शिंदे सरकारचे हे अखेरचं अधिवेशन आहे.

यातच शिवसेना ( ठाकरे गट ) पक्षप्रमुख उद्धव ठाकरे यांनी शिंदे सरकारवर टीका करत विधानसभेचं रणशिंग फुकलं आहे. खोके सरकारच्या निरोपाचं हे अधिवेशन असल्याचा हल्लाबोल उद्धव ठाकरेंनी केला आहे. पदवीधर निवडणुकीचे मतदान केल्यावर उद्धव ठाकरे माध्यमांशी संवाद साधत होते.

उद्धव ठाकरे ( Uddhav Thackeray ) म्हणाले, "विरोधी पक्षाला संपवण्यासाठी केंद्रीय तपास यंत्रणांचा मोदी यांनी वापर केला. पश्चिम बंगाल, दिल्ली, झारखंड, महाराष्ट्रासारख्या राज्यांतील मुख्यमंत्री, मंत्री, आमदार, खासदारांना तुरुंगात डांबलं. कारण, ते भाजपविरोधी होते. विरोधी पक्षाचा आवाज जपला पाहिजे. देशाला मजबूत विरोधी पक्षाची गरज आहे, असा साक्षात्कार मोदींना गेल्या दहा वर्षांत झाला नाही."

"मोदी ( Narendra Modi ) आणि त्यांच्या गुजराती 'ईस्ट इंडिया' कंपनी देश चालविण्याच्या नावाखाली उत्सव इव्हेंट, नाटकेच केली. मोदी आता म्हणतात की, 'देशाला एक जबाबदार विरोधी पक्ष हवा.' मात्र, दहा वर्षांत विरोधी पक्ष फोडून त्यांना कमजोर करण्याचं काम मोदी यांनीच केलं. देशात विरोधी पक्ष टिकूच द्यायचा नाही. लोकसभा, राज्यसभा, विधानसभा आणि बाहेर जे कोणी देशाच्या तसेच जनतेच्या प्रश्नांवर आवाज उठवतील अशांना भाजपत आणायचे किंवा तुरुंगात टाकायचे. हे मोदी यांचे धोरण विरोधी पक्ष मजबूत करण्याचे होते काय?" असा सवाल उद्धव ठाकरेंनी उपस्थित केला आहे.

"पंतप्रधान म्हणून मोदींनी संसदेत आणि बाहेर दहा वर्षे जे केले त्यास नौटंकी असेच म्हणतात. आता तेच बहुमत गमावल्यावर थोडे जमिनीवर आले आणि संसद अधिवेशनाच्या पहिल्याच दिवशी बोलून गेले की, 'देशाच्या जनतेला नौटंकी, धिंगाणा आणि घोषणाबाजी नको आहे. त्यांना एक चांगला आणि जबाबदार विरोधी पक्ष हवा आहे.' मोदींनी हे सांगणं म्हणजे हुकूमशहाने गीता वाचवण्यासारखेच आहे," असा खोचक टोलाही उद्धव ठाकरेंनी लगावला आहे.