Uddhav-Raj Thackeray Defeated : मोठी बातमी! पहिल्याच निवडणुकीत ठाकरे बंधुंचा दारुण पराभव, 'बेस्ट'मध्ये भोपळाही फुटला नाही!

Shashank Rao Panel Win : बेस्ट कामगारांच्या पतपेढीच्या निवडणुकीसाठी एकत्र आलेल्या ठाकरे बंधुंना पहिल्याच निवडणुकीत मोठा झटका बसला आहे. 21 जागांवर उद्धव ठाकरे-राज ठाकरे यांच्या उत्कर्ष पॅनलला एकही जागा जिंकता आली नाही. तर, आमदार प्रसाद लाड यांच्या महायुती प्रणित समृद्धी पॅनलला अवघ्या 7 जागा मिळाल्या आहे. तर, सर्वाधिक जागा जिंकत शशांक राव यांच्या पॅनलने सत्ता मिळवली आहे. शशांक राव यांच्या पॅनलने 14 जागा जिंकल्या आहेत.

सोमवारी 'बेस्ट' पतपेढीसाठी निवडणुकी झाली. या निवडणुकीत तब्बल 83 टक्के मतदान झाले होते. विशेष म्हणजे उद्धव ठाकरे यांची कामगार सेना आणि राज ठाकरेंची मनसे यांची पहिल्यांदाच या निवडणुकीसाठी युती झाली होती. त्यामुळे या निवडणुकीत ठाकरे बंधू चमत्कार घडवणार अशा चर्चा होत्या. मात्र, शशांक राव यांच्या पॅनलने सर्वाधिक जागा जिंकत सत्ता मिळवली तर, ठाकरे बंधुंच्या पॅनलला भोपळा देखील फोडता आला नाही.

सोमवारी मतदान झाल्यानंतर मंगळवारी सकाळी मतमोजणीला सुरुवात होणार होती. मात्र, पावसामुळे निवडणूक अधिकारी दुपारी आले. त्यानंतर मजमोजणी सुरू झाली. रात्री उशीरापर्यंत मतमोजणी सुरू होती आणि बुधवारी पहाटे निकाल जाहीर करण्यात आला.

एकुण 35 केंद्रावर ही निवडणूक पार पडली. तर, तब्बल 150 उमेदवार रिंगणार होते. दरम्यान मुंबई महापालिकेसाठी ठाकरे बंधू एकत्र येण्याची चर्चा सुरू असताना या पहिल्याच निवडणुकीत झालेला पराभव शिवसेना उद्धव बाळासाहेब ठाकरे पक्ष आणि मनसेला मोठा धक्का मानला जातोय.

ठाकरेंनी 9 वर्षांची सत्ता गमावली

बेस्ट पतपेढीवर मागील नऊ वर्षांपासून उद्धव ठाकरेंच्या कामगार सेनेची सत्ता होती. यंदा त्यांनी मनसेसोबत युती केल्याने त्यांना फायदा होईल, असा अंदाज होता. मात्र, त्यांच्या विरोधात शशांक राव यांचे पॅनेल तसेच प्रसाद लाड, नितेश राणे, प्रवीण दरेकर यांचे महायुतीचे सहकार समृद्धी पॅनल होते. या तिरंगी लढतीमध्ये दारुण ठाकरे बंधूंच्या पॅनलला दारुण पराभव स्वीकारावा लागला.