Vasai–Virar Politics : ठाकूरांना मिळणार ठाकरेंची ताकद; 'मातोश्री'चे दूत विरारमध्ये! भाजपला रोखण्यासाठी नवे समीकरण!

Local Body Election : एकमेकांच्या विरोधात लढलेले बविआ आणि शिवसेना उद्धव बाळासाहे ठाकरे पक्ष हे पक्ष एकत्र येण्याच्या हालचालींना वेग आला आहे. जिल्ह्यात भाजपची वाढती लोकप्रियता आणि बविआची झालेली पीछेहाट तसेच ठाकरे गटालाही पुन्हा उभारी मिळावी यासाठी हे दोन्ही पक्ष एकत्र निवडणूक लढविण्यासाठी प्रयत्न करत असल्याचे दिसत आहे.

पालघर जिल्ह्यातील नगरपरिषदा, नगरपंचायती, जिल्हा परिषद व पंचायत समित्या तथा त्यानंतर होवू घातलेल्या वसई-विरार शहर महापालिका निवडणूक अशा अनेकविध निवडणुकांच्या संदर्भात चर्चा करण्यासाठी ठाकरेंच्या पक्षाचे पालघर जिल्हा संपर्क प्रमुख विलास पोतनीस, पालघर जिल्हा निवडणूक यंत्रणा प्रमुख अमोल गजानन किर्तीकर यांनी बहुजन विकास आघाडीचे अध्यक्ष माजी आमदार हितेंद्र ठाकूर यांची विरार येथे भेट घेवून चर्चा केली.

शिवसेनेचे माजी खासदार विनायक राऊत यांच्या सूचनेनुसार पोतनीस व किर्तीकर यांनी हितेंद्र ठाकूर यांच्याशी आगामी काळात राजकीय सोयरीक करण्याबाबत चाचपणी केली. या एकूणच प्रकाराकडे 'मातोश्री'चे दूत विरार मध्ये या दृष्टिने पाहिलं जात असून ही ठाकरे-ठाकूर युतीची नांदी समजली जात आहे.

बविआने यापूर्वीच उद्धव ठाकरे हे भविष्य काळात राज्याचे मुख्यमंत्री असावेत अशी भूमिका घेतलेली आहे.आगामी काळात, भाजपा प्रणित महायुतीला स्थानिक स्वराज्य संस्थांमधील सर्व प्रकारच्या राजकीय सत्तेपासून दूर ठेवण्याचा प्रस्ताव शिवसेना उद्धव बाळासाहेब ठाकरे पक्षाने बहुजन विकास आघाडीला दिल्याची माहिती आहे. बहुजन विकास आघाडी पक्षाची देखील असल्याने आगामी काळात पालघर जिल्ह्यात ठाकरे-ठाकूर एकत्र येण्यास अडचण नसल्याची स्थिती आहे.

मविआ-बविआ युती होणार

वसई पूर्व चिंचोटी येथे बुधवारी मविआमधील विविध घटक पक्ष व बहुजन विकास आघाडी पक्षाच्या पदाधिकाऱ्यांची आगामी स्थानिक स्वराज्य संस्थाच्या निवडणुकांसदर्भात बैठक झाली. यावेळी मविआ व बविआ एकत्र येण्याबाबत मविआ व बविआ या दोन्ही पक्षांतील प्रमुख मंडळींनी सकारात्मक भाष्य केलं.