Eknath Shinde Politics : एकनाथ शिंदेंचा उत्तर भारतीय मतांवर डोळा, महापालिका निवडणुकीच्या आधी उद्धव ठाकरें मोठा झटका!

Eknath Shinde News : आगामी मुंबई महापालिका निवडणुकीच्या पार्श्वभूमीवर मराठी विरुद्ध उत्तर भारतीय, असा वाद निर्माण झाला होता. हिंदीच्या सक्तीवरून उद्धव ठाकरेंनी आक्रमक भूमिका घेतली होती. त्यामुळे मराठी मतदारांना त्यांनी साद घातली होती. आता, एकनाथ शिंदेंनी उत्तर भारतीय मतांसाठी मोठा डाव टाकला आहे. मुंबईतील उत्तर भारतीय एकता मंचाच्या प्रमुख पदाधिकाऱ्यांसह शेकडो कार्यकर्त्यांना त्यांनी आपल्या पक्षात प्रवेश दिला.

शिवसेना उद्धव बाळासाहेब ठाकरे पक्षाशी संलग्न असलेल्या उत्तर भारतीय एकता मंचच्या प्रमुख पदाधिकाऱ्यांसह शेकडो कार्यकर्त्यांनी पक्षात प्रवेश केला, असे एकनाथ शिंदे यांनी सांगितले. तसेच मुंबई, ठाणे, कल्याण, मीरा-भाईंदर, नालासोपारा आदी ठिकाणी मोठ्या प्रमाणावर उत्तर भारतीय राहतात. त्यांच्या विविध प्रलंबित प्रश्नांचे प्राधान्याने निराकरण केले जाईल असा विश्वास याप्रसंगी त्यांनी व्यक्त केला.

मुंबईसह राज्याच्या विविध भागांमध्ये लाखो उत्तर भारतीय राहतात. पिढ्यानपिढ्या येथे स्थायिक झाले असून महाराष्ट्राच्या संस्कृतीशी आणि येथील मातीशी ते एकरूप झाले आहेत. त्यांनी आज खऱ्या शिवसेनेमध्ये प्रवेश केला असून त्यांचे मी स्वागत करतो असे देखील शिंदे म्हणाले.

वंदनीय हिंदुहृदयसम्राट शिवसेनाप्रमुख बाळासाहेब ठाकरे आणि वंदनीय गुरुवर्य धर्मवीर आनंद दिघे साहेब यांच्या विचारधारेवर खरी शिवसेना चालत आहे. मुख्यमंत्री असताना केलेल्या विकासकामांवर प्रभावित होऊन आपण शिवसेनेमध्ये दाखल झाला आहात. आता आपण सर्वजण एक परिवार म्हणून राहणार असून परस्परांना सहयोग देणार आहोत असे देखील त्यांनी सांगितले.

शिवसेनेत प्रवेश केलेले पदाधिकारी

उत्तर भारतीय एकता मंचचे अध्यक्ष प्रेम विश्वकर्मा, उपाध्यक्ष सुनील गुप्ता, उपाध्यक्ष उपेश जयस्वाल, महासचिव राजकुमार यादव, सचिव दया शंकर तिवारी, कोषाध्यक्ष अरुण तिवारी तसेच संजय दुबे, राज बहादुर यादव, रवी तिवारी, अनिल उपाध्याय, पुनम जयस्वाल, बिंदू गुप्ता, कृष्णकुमार दुबे, रमेश सिंह, विश्वजीत सिंग, बाबुराव प्रजापती, हरिदास विश्वकर्मा यांच्यासह शेकडो कार्यकर्त्यांनी शिवसेनेमध्ये प्रवेश केला.