Laadki Bahin Yojana: लाडक्या बहिणींना दोन महिन्याचे 3000 हजार रुपये कधी मिळणार?

दोन महिन्यापासून मुख्यमंत्री लाडकी बहीण योजनेतील पात्र लाडक्या बहिणींना पैसे न मिळाल्याने त्या नाराज आहेत, पैसे कधी मिळणार अशी विचारणा त्यांच्याकडून होत आहे. प्रशासनाकडून दोन महिन्याचे पेसे एकत्र देण्यासाठी हालचाली सुरु आहे. मे-जूनचे पैसे वटपौणिमेच्या दिवशी देण्याचे नियोजन सरकारचे सुरु असल्याचे समजते. पण याबाबत अद्याप सरकारकडून कुठलीही घोषणा करण्यात आलेली नाही.

येत्या 10 जून रोजी वटपौणिमा आहे. या दिवशी लाडक्या बहिणींच्या बँक खात्यावर पैसे जमा होण्याची शक्यता आहे. दुसरीकडे या योजनेतील लाभार्थ्यांची पडताळणी होत आहे. हजारो महिला अपात्र ठरल्या आहेत. आश्चर्य म्हणजे सरकारी नोकरी करणाऱ्या 'लाडक्या बहिणींनी'सरकारच्या या योजनेचे पैसे हडप केल्याची माहिती समोर आली आहे.

सुमारे तीन हजार महिला ज्या सरकारी नोकरी करीत आहेत, त्यांनी योजनेचा गैरफायदा घेतला आहे. अशा 'खोटारड्या' लाडक्या बहिणींवर 'देवाभाऊ' कारवाई करणार असल्याची चर्चा होती, पण उपमुख्यमंत्री अजित पवार यांनी या 'सरकारी' लाडक्या बहिणींवर कारवाई करण्यात येणार नाही, असे स्पष्ट केले आहे. त्यामुळे 'या'बहिणींना दिलासा मिळाला आहे. अजितदादांनी सरकारी बहिणींना अभय दिला आहे.

लाडकी बहीण योजनेची अमलबजावणी करताना सरकारी नोकरी करणाऱ्या महिलांनी योजनेचा फायदा घेतला, ही आमची चुक झाली, अशी कबुली अजितदादांनी पत्रकारांशी बोलताना दिली. आयकर विभागाकडून लाडक्या बहिणींचे माहिती मागवण्यात येत आहे.

सरकारी गलेलठ्ठ पगार असणाऱ्या लाडक्या बहिणींनी या योजनेचा लाभ घेतल्याचे समोर आले आहे. सरकारी नोकरी करणाऱ्या 2,652 महिलांनी लाभ घेतला आहे. राज्य सरकार त्यांना दिलेली रक्कम वसुल करणार असल्याची माहिती आहे. आणखी सहा लाख कर्मचाऱ्यांची अशाच पद्धतीने तपासणी केली जाणार असल्याची माहिती सूत्रांनी दिली.