Sharmila Thackeray on Yashashree Shinde : यशश्री शिंदे हत्या प्रकरण; पोलिस आयुक्तांच्या भेटीनंतर शर्मिला ठाकरे संतापल्या

Navi Mumbai News, 30 July : उरण येथील यशश्री शिंदेची निर्घृण हत्या झाल्यानंतर संपूर्ण राज्यभरातून तीव्र संताप व्यक्त केला जात आहे. आरोपीवर कठोर कारवाई करण्याची मागणी देखील जोर धरत आहेत. अशातच आज (ता.30 जुलै) रोजी मनसे नेते राज ठाकरे यांच्या पत्नी आणि मनसे नेत्या शर्मिला ठाकरे (Sharmila Thackeray) यांनी यशश्रीच्या कुटुंबीयांची भेट घेतली.

यावेळी त्यांनी यशश्री शिंदेच्या हत्येप्रकरणी नवी मुंबई पोलिस आयुक्तांची देखील भेट घेतली. या भेटीनंतर त्यांनी तीव्र संताप व्यक्त करत महिलांवर अत्याचार करणाऱ्या पुरुषांवर कोणतीही दयामाया न दाखवता, धर्म न बघता त्यांच्यावर कठोर कारवाई करण्याची मागणी केली.

नवी मुंबई (Navi Mumbai) आणि उरण परिसरात मागील काही दिवसांत महिला अत्याचारांची तीन प्रकरणे उघडकीस आली आहेत. या सर्व आरोपींवर कारवाई करावी, तसंच शक्ती कायद्याची या वर्षापासून अंमलबजावणी करा, अशी मागणी देखील शर्मिला ठाकरे यांनी केली.

पोलिस आयुक्तांची भेट घेतल्यानंतर माध्यमांशी बोलताना शर्मिला ठाकरे म्हणाल्या, "आम्ही पोलिसांवर प्रचंड नाराज आहोत. यशश्री शिंदेंच्या कुटुंबीयांची भेट घेण्यासाठी येत असताना माझ्या समोर अशीच एक तिसरी घटना समोर आली. मुलीने नकार दिला म्हणून तिला बेदम मारहाण करण्यात आली. अशा प्रकरणात पोलिसांनी (Police) योग्य ती कारवाई करुन आपली दहशत दाखवून दिली पाहीजे."

शक्ती कायदा पास करा

तसंच, मागील काही दिवसांपासून अतिशय हिंस्रपद्धतीने मुलींवर अत्याचार होत आहेत. निर्भया प्रकरणातील आरोपीला अल्पवयीन असल्यामुळे सोडण्यात आलं, हे चुक आहे. ज्या मुलामध्ये इतकी विकृती आहे, त्याला आयुष्यभर तुरुंगात ठेवावे किंवा थेट फाशीची शिक्षा द्यावी.

मंदिरातील पुजारीही जर महिलांवर अत्याचार करत असतील, मुलींना फसवून त्यांच्याशी लग्न करत असतील तर त्यांच्यावर पोलिसांची दहशत असली पाहीजे. या लोकांवर पोलिसांची दहशत असलीच पाहिजे. पोलिस काय करु शकतात, हे या पुरुषांना कळलं पाहिजे. ते जोपर्यंत कळत नाही तोपर्यंत हे पुरुष थांबणार नाहीत. त्यामुळे याच वर्षी शक्ती कायदा पास करावा, अशी पंतप्रधानांना विनंती आहे. तसंच असे गुन्हे झाले की त्यांना फाशीच झाली पाहिजे, अशी मागणी शर्मिला ठाकरेंनी यावेळी केली.