Zeeshan Siddiqui Threat : वडिलांच्या हत्येचा उल्लेख करत झिशान सिद्दीकी यांना मेलद्वारे जीवे मारण्याची धमकी

Mumbai News, 22 Apr : उपमुख्यमंत्री अजित पवार यांच्या राष्ट्रवादीचे नेते दिवंगत बाबा सिद्दीकी यांचे पुत्र माजी आमदार झिशान सिद्दिकी यांना पुन्हा एकदा जीवे मारण्याची धमकी देण्यात आली आहे. ई-मेल द्वारे त्यांना ही धमकी देण्यात आली आहे.

या ई-मेलमध्ये 'जो हाल तेरे बाप का हुआ, वही तेरा होगा'; असं म्हणत जीवे मारण्याची धमकी देण्यात आली आहे. या घटनेची माहिती पोलिसांना होताच त्यांनी झिशान सिद्दीकी यांच्या घरी जाऊन त्यांचा जबाब नोंदवला आहे.

झिशान सिद्दिकी यांचे वडील बाबा सिद्दीकी यांची मागील वर्षी हत्या करण्यात आली होती. त्यांना देखील हत्येआधी जीवे मारण्याची धमकी देण्यात आली होती. बाबा सिद्दीकी यांची हत्या लॉरेन्स बिश्नोई टोळीने केल्याचं तपासानंतर स्पष्ट झालं.

तेव्हापासून सिद्दीकी कुटुंबियांची सुरक्षितता वाढवण्यात आली आहे. असं असतानाही आता पुन्हा एकदा झिशान यांना धमकीचा मेल आल्यामुळे एकच खळबळ उडाली असून पोलिसांनी योग्य ती खबरदारी घेत पुढील तपासाला सुरूवात केल्याची माहिती आहे.