BJP Vs Congress News : राहुल गांधीवरील कारवाईविरोधात पिंपरीतून कॉंग्रेस मोदींना पाठवणार एक लाख पत्र

Pimpri Chinchwad News : काँग्रेसचे माजी अध्यक्ष राहुल गांधींची खासदारकी रद्द केल्याच्या निषेधार्थ पिंपरी-चिंचवड कॉंग्रेसने २८ मार्चपासून शहरात जनआंदोलन सुरु केले आहे. त्यात शनिवारी मूक मोर्चा काढण्यात आला. तर रविवारी (दि.२) जेलभरो आंदोलन करण्यात आले.

पिंपरी चिंचवडमधील काँग्रेसच्या जेलभरो आंदोलनाला मोठा प्रतिसाद मिळाला.आंदोलकांच्या मोठ्या संख्येच्या पोलिसांच्या फक्त दोनच व्हॅन होत्या. एकातून महिला व दुसऱ्या व्हॅनमधून पुरुष अशा हातावर मोजता येईल, इतक्याच आंदोलकांना वाकड पोलिसांनी ताब्यात घेऊन ठाण्यावर नेले. नंतर लगेचच त्यांना सोडूनही दिले.

पक्षाचे शहराध्यक्ष डॉ. कैलास कदम,माजी महापौर कविचंद भाट, महिला अध्यक्षा सायली नढे, युवक अध्यक्ष कौस्तुभ नवले, एनएसयुआय प्रदेश उपाध्यक्ष ॲड. उमेश खंदारे, वरिष्ठ उपाध्यक्ष नरेंद्र बनसोडे, चिंचवड ब्लॉक अध्यक्ष ज्ञानेश्वर मलशेट्टी आदींचा त्यात समावेश होता.

तत्पूर्वी राहूल गांधीं(Rahul Gandhi)ची खासदारकी रद्द करणं हा लोकशाहीचा खून आहे असा हल्लाबोल कॉंग्रेसचे शहराध्यक्ष डॉ.कैलास कदम यांनी आंदोलनस्थळी केला. यावेळी केंद्र सरकारच्या विरोधी घोषणा आंदोलक देत होते.राहुल गांधी यांच्या समर्थनार्थ शहरात काँग्रेसने सह्यांची मोहीमही सुरू आहे. त्याजोडीने ते शहरातून केंद्र सरकारच्या निषेधाची एक लाख पोस्ट कार्ड पंतप्रधान नरेंद्र मोदींना पाठणार आहेत.

काय आहे प्रकरण?

काँग्रेसचे वरिष्ठ नेते राहुल गांधी यांनी मोदी आडनावावरून केलेल्या वक्तव्याबद्दल दाखल खटल्यात कोर्टानं दोन वर्षे शिक्षा सुनावल्यानंतर काही दिवसांपूर्वी त्यांची खासदारकी रद्द झाली होती. काँग्रेसचे माजी अध्यक्ष राहुल गांधी यांना खासदारकी रद्द झाल्यानंतर आणखी एक धक्का बसला आहे. राहुल गांधी यांना २२ एप्रिलपर्यंत सरकारी बंगला रिकामा करावा लागणार आहे. सूत्रांच्या माहितीनुसार, राहुल गांधी यांना १२ तुघलक रोड येथील बंगला रिकामा करण्याचे निर्देश देण्यात आले आहे. लोकसभेच्या हौसिंग कमिटीने यासंदर्भात राहुल गांधींना नोटीस धाडली आहे.