Pimpri-Chinchwad: शहर कार्यकारिणीत मिळालं नाही मनासारखं पद! भाजपच्या पदाधिकाऱ्यानं दिला थेट आत्मदहनाचा इशारा

Pune News : भाजपचे पिंपरी-चिंचवड शहराध्यक्ष शत्रुघ्न घाटे यांनी तब्बल साडे तीनशे जणांची जम्बो शहर कार्यकारिणी जाहीर केली आहे. मात्र, कार्यकारणी जाहीर होतात मोठ्या प्रमाणात अंतर्गत कलह सुरू झाला असल्याचं पाहायला मिळत आहे. कारण कार्यकारणी जाहीर होताच 24 तासांच्या आत राजीनामा सत्र सुरू झालं आहे. माजी उपमहापौर तुषार रघुनाथ हिंगे यांनी आपल्या पदाचा राजीनामा शहराध्यक्षांकडं सोपवला. तर दुसऱ्या एका कार्यकर्त्याला मनासारखं पद न मिळाल्यानं त्यानं थेट आत्मदहनाचा इशाराच दिला आहे.

यामध्ये लिहिलं आहे की कालच माझी पिंपरी चिंचवड शहर उपाध्यक्ष म्हणून निवड झाली आहे. आज मी माझ्या वैयक्तिक कारणामुळे शहर (जिल्हा) उपाध्यक्ष पदाचा राजीनामा देत आहे. आणि यापुढील काळात एक सामान्य कार्यकर्ता म्हणून मी पक्ष वाढीसाठी त्याच जोमाने काम करत राहीन असं या राजीनाम्यात नमूद करण्यात आला आहे. त्यांना देण्यात आलेल्या पदावरून नाराज असल्याचे सांगितला जातो त्यामुळे त्यांनी राजीनामा दिल्याचं बोलत आहे.

हिंगे यांच्यापाठोपाठ संतोष तापकीर यांनी आपली नाराजी व्यक्त केली आहे. याबाबत तापकीर यांनी शहराध्यक्षांना एक पत्र लिहिले आहे. त्यात म्हंटल आहे की भारतीय जनता पक्षाचे (भाजपा) गेल्या ३० वर्षांपासून निष्ठावान कार्यकर्ते असलेले संतोष भाऊसाहेब तापकीर यांनी पक्ष नेतृत्वावर गंभीर आरोप केले आहेत. पक्षाने नव्याने जाहीर केलेल्या शहर कार्यकारिणीत आपले खच्चीकरण केल्याचा दावा त्यांनी केला असून, येत्या दोन दिवसांत पक्ष कार्यालयासमोर आत्मदहनाचा इशारा दिला आहे.

तापकीर म्हणाले, माझे वडील कै. भाऊसाहेब ज्ञानेश्वर तापकीर हे पक्ष स्थापनेपासून निष्ठावान कार्यकर्ते होते. स्वतः संतोष यांनी गेल्या तीन दशकांपासून पक्षाच्या आंदोलनांमध्ये, मोर्चांमध्ये सक्रिय सहभाग घेतला आहे. त्यांनी मंडल सरचिटणीस, दोन वेळा मंडल अध्यक्ष, किसान मोर्चा शहराध्यक्ष, शहर उपाध्यक्ष आणि शहर चिटणीस अशा विविध पदांवर प्रामाणिकपणे काम केले आहे. मात्र, नव्याने जाहीर झालेल्या शहर कार्यकारिणीत त्यांना अपेक्षित शहर सरचिटणीस पदाऐवजी कमी महत्त्वाच्या जबाबदारीने त्यांचे खच्चीकरण झाल्याचा आरोप त्यांनी केला आहे.