Arun Gavali: मोठी बातमी! अरुण गवळीला सुप्रीम कोर्टाकडून जामीन मंजूर! 18 वर्षांनंतर येणार तुरुंगातून बाहेर

Arun Gavali: कुख्यात गँगस्टर अरुण गवळीला सुप्रीम कोर्टाकडून अखेर जामीन मंजूर करण्यात आला आहे. त्यामुळं १८ वर्षांनंतर गवळी आता तुरुंगातून बाहेर येणार आहे. शिवसेनेचे नगरसेवक कमलाकर जामसंडेकर हत्या प्रकरणात कोर्टानं गवळीला हा दिलासा दिला आहे. या प्रकरणात आपल्याला जामीन मिळावा यासाठी गवळीनं वारंवार कोर्टाकडं अर्ज केला होता.

कमलाकर जामसंडेकर हा खून खटला मुंबईत खूप गाजला होता. या खटल्यात गवळीला जन्मठेपेची शिक्षा झाली होती, गेल्या १८ वर्षांपासून तो तुरुंगात होता. त्यामुळं आता जामीन मंजूर झाल्यानं १८ वर्षानंतर गवळी तुरुंगाबाहेर येणार आहे. दुसऱ्या एका खटल्यात अरुण गवळी हे नागपूरच्या तुरुंगात शिक्षा भोगत होते. पण या खटल्यात मे महिन्यातच कोर्टानं अटी-शर्तींसह मुंबई हायकोर्टानं जामीन मंजूर केला होता. पण कमलाकर जामसंडेकर खून खटल्यात त्याला जामीन मंजूर होत नसल्यानं गवळीला तुरुंगातच राहावं लागलं होतं.

पण आता सुप्रीम कोर्टानं या खटल्यातही जामीन मंजूर केल्यानं गवळीला मोठा दिलासा मिळाला आहे. सुप्रीम कोर्टात गवळीच्या वकीलानं बाजू मांडताना गवळीला झालेली अटक ही नैसर्गिक न्यायाच्या बाजूनं नव्हती असं म्हटलं. तसंच मोक्का अंतर्गत त्याच्यावर कारवाई करण्यात आल्याचंही वकिलानं यावेळी सांगितलं.